Naatsiiat tallimat 2 kg-nngortippai

Nunatta naasui allallu misileraatigineqarput. (ass./foto: Jens P. Møller)

 

All.: Jens P. Møller

Sisimiuni naasut assigiinngitsut misileraatigalugit naatinneqarput, ilai iluatsinngitsut ilaali iluatsilluartut.

Qaasuitsup killeqarfiata avannaani naasinnaasut killeqarsinnaasarput. Ukiumut qaammatit arfineq marluk aputeqartartumi aasamilu naaqisumi nunatta naasui naagaangata qalipaatigittaqaat tipigittaqalutillu. 2015-imi ukiassakkut Sisimiuni illup (sumiinnera aaqqissuisoqarfiup nalunngilaa) kusassarniarlugu ilaatigut nunatta naasui naatinniarlugit aalajangertoqarpoq. Tamanna misileraanermik ilaqarpoq. Siullermik illup naasui naatsiiviutillip silamut ilisaraluarpai, silaannarli nillertoq akiorsinnaanngilaat. Silateq qaarsorasaartoq ujaqqanik angivallaanngitsunik ilaannili anginerulaartunik ungalullugit naatsiivilersorpaa, ujaqqat ilaatigut sissameersut majuuttarlugit.

- Nuna maliinnarlugu ujaqqat iliorartarpakka kusagileraangakkit ingerlateqqittarlugit. Taamaalillunga naasuliviit amerliartortippakka majsit, guloruujut, eertat, salatit allallu naatittarlugit, naatsiiviutilik oqaluttuarpoq.

- Issoq qimmilivimmiittoq misileraatigaara naggorissaateqarsoralugu. Kisianni naatsiiviit sanaama tulleriinneri puigulaarpakka amerlinermik, misileraasoq oqarpoq.

Naatsiiviutilik imerterileraangat imeq kuuffimmeersoq atorumaneq ajorpaa, taanna imeqarfimmiit akuiagaagami kloreqarlunilu. Taamaattumik kuummut imertartarpoq dunkillu arlallit imertaatigisarlugit. Naatsiivinni issoq ullut tamaasa imertertagaanngitsoq aamma oqaatigaa, sialualaarsimagaangat issoq assalaarlugu isugutaaraangat tassa naatsiivik imminut imertersimasarami imertertariaarussimasarpoq, naak qaava panertutut pissuseqaraluarluni. Ukiut pingasut matuma siorna Brugsenip atorunnaagai naatsiiassat spisekartofler silatimini tallimat ikkuppai, katillugillu kiilut marluk sinneqartut naatillugit. Maannamut naatsiianut naatsiivik 5 miiterinik takissuseqarpoq. Upernaarli manna pueqqorami suli naasoqarsimanngilaq. Immaqamigooq aamma itinaarsimagai, tassa tamanna misileraanermik taaneqartarnerarpaa. Dunkiutai imermik imaqartuaannarput.

 

Tamatigut aappassaa iluatsittarpoq

Naatsiiassat siornaak ikkussat siorna aatsaat iluatsittumik naapput. Valmuit misileqqaaramigit ingerlaannaq naanngitsunut ilaapput, ukioq mannali valmue naasimammat nuannaarutigaa. Nunatta naasuisa klimatsinnut akiuussinnaassusiat takorusuttarpaa, naatsiivianilu nunatta naasuini seernat upernaakkut sikkeqqaartarnerarpai. Naatsiiassat ilaat immikkoortillugit illup iluani naateqqaartarpai kingorna sorlanippata naatsiivimminut ikkuttariaannanngorlugit. Naatsiiviisa ilaanni qeqqussat panertut aserortikkat issumut akulerullugit misilippai naggorissaataassasoralugit, nalunngisaa aamma taamatut misiliisimagami. Qeqqussammi aamma tarajoqarput peqqinnarluartunik. Naatsiiassat ukiut marluk qaangiukkaangata aatsaat iluamik naasarnerarpai, naasussaq issumut sungiussiniaqqaartarsimagunarmat.
- Aalisagartoraangatta qajoq imertagarput naasunut imerterutigalugu unnia pitsaasoq. Naatsiiviit marluk - aappaa imermik nalinginnarmik imertigaq, aappaalu aalisakkap qajua - qajortornikoq qorsooqqinnerusunik naasoqartarsimagami, oqarpoq. Tassaapput misileragassama ilaat, naatsiiviutilik oqarpoq.

 

Sisimiut kusassartigu

Illup eqqaa orpeqarpoq. Orpiit pingasut tassaapput Laasi Kristiansenip tunissutai, naareernikut tunniussimagamigit. Orpiit sibirisk birkimik ateqarput. Naatsiiviutilik neriuppoq orpiit naalluarsinnaassasut, maannamummi sikkertoqareersimapput. Orpiit ullut tamaasa qivialaartuaannarpai. Nunarput issittaraluaqisoq orpiit aalajangersimasut issittumi naasarput. Naatsiiviliaasa issortaat ikkannerpaaq 20 cm-sut ititigivoq, eqqamini issortartarpoq. Orpiit ikkussukkat avataanni orpikkanik kaajallapajaarlugu ikkussuinikuuvoq anorimut illersuutaalluartussanik. Orpik ataaseq Danmarkimeersuuvoq. Orpik taanna iluminni fuglelortimik (timmissap anaa) taagorpaat, tassagooq Danmarkimi timmissat ilaata orpiit naatsiiassaanik nerinikuummat, anarigamiullu orpik tassani naasimalluni, naluaali orpik sunarpiaanersoq. Orpiit Laasi Kristiansenip tunissutai 2013/14-imi ikkutaasimapput. Naatsiiviutillip sisimiormiut kajumissaarpai illoqarfipput naatsiiveqarnerup tungaatigut kusassaaqataaffigissagaat, pinngortitap naatissinnaasaanik illoqarfipput pinnersarsinnaagatsigu. Assersuutigiinnarlugu Nuummi orpiit portusuut illut silataanniittut kusanartartorujussuupput, maanilu Sisimiuni aamma taamaaliukutsoorsinnaavugut, misileraallammak naggasiivoq.

 

 

Naatsiivik 950px 02

Imeq kuummeersoq atorumaneruaa. (ass./foto: Jens P. Møller)

 

Naatsiivik 950px 03Issiaveqarpoq aamma. (ass./foto: Jens P. Møller)