Sisimiuni inerisaanerit piviusunngulersut

Qaqqap iluani naluttarfissaq 2020-mi naammassissangatinneqarpoq. (ass./foto: Verkís / Arkís arkitekter)

 

Qeqqata Kommunia Taseralimmi innuttaasunik ataatsimiisitsinerani Sisimiuni pilersaarutit piviusunngulersut pillugit peqataasunut saqqummiiffigivai.
Isersimasut soqutiginnilluarlutik malinnaapput apeqquteqartarlutillu. Qeqqata Kommuniani borgmesteri Malik Berthelsen aamma Ineriartortitsinermut ingeniøri Mathias Dahl saqqummiisuupput. Ukioq manna aasap ingerlanerani suliniutit arlaqartut piviusunngortinneqarnialerput.

 

Ivigaaraasanik arsaattarfik

Sisimiuni ivigaaraasanik arsaattarfissaq pilersaarutit malillugit aasap ingerlanerani piareertussap qanoq isikkoqassanersoq qanorlu atorneqartassanersoq saqqummiunneqarmat pissanngatigineqarpoq. Arsaattarfik ungaloqartussaassaaq, biilit, snescooterit inuillu asuli aqqutigisannginniassammassuk. KTI-ip tungaani biilinik unittarfeqassaaq, siornatigut arsaattarfitoqqap isaariaata tungaa biilerpassuarnik uniffigineqartarsimasoq allanngortinneqassalluni.
Arsarnermi taartissamaatit illugiillutik issiaveqassapput akunneranilu isertarfeqassalluni. Teqeqqumi kujallermi aamma isertarfeqassaaq kiisalu biilit unittarfiata eqqaani teqeqqumi. Siullermik arsaattarfitoqaasumi isertarfiusimasoq matoqqatinneqassaaq.

 

Beachvolley

Spejderit illuutaata Nalunnguarfiullu eqqaani beach bolleyball-ertarfissaq aasap ingerlanerani piareerneqassaaq. Sioqqat tulluartut arsaaffiup iluani iliorarneqassapput. Arsaaffiusussaq 8 x 16 miiterinik angitigissaaq, arsaaffiullu avataa tungaa ilanngullugu 15 x 23 miiterinik angitigissalluni.
Tamanna piviusunngortinniarneqarsimavoq aningaasaliissutit sinneruttut atorlugit.

 

Silami timersortarfik

Kollegiekut sungaartut Minngortuunnguup atuarfiatalu akornanni silami timersortarfimmik pilersitsisoqassaaq. Borgmesterip Malik Berthelsen-ip eqqaavaa soorlu sakkutuut sungiusaraangamik silami timersuut atortaraat. Katillugu aqqutissaa 256 miiteriuvoq, aqqanilinnillu unammilligassanik aqqusaagaqartassaaq, kiisalu kissasserfeqassalluni.

 

Naluttarfik

Sisimiuni naluttarfittaassaq SSP-ip eqqaani qaqqap iluani suliarineqartussaavoq. Siullermik kangiata tungaaniinnerulluni inissisimagaluartoq maanna kitaa tungaanut aqquserngup tungaanut inissinneqarpoq, qaqqap ilusaa tunngavigalugu aaliangerneqarsimalluni. A.P. Møller Fonden-imit 2016-imi aningaasalerneqarniarnera akuerineqarpoq, 2020-milu naammassissangatinneqarluni. Naluttarfissap qaavani Qajaasani najugallit kommunimit nalunaarsorneqarsimasut tamarmik qaartiterisoqannginnerani nalunaatsorneqarluaqqaassapput. Tassani peqqutaavoq qaartiterinermi ajoqusiisoqarsimassappat illlersorneqarsinnaaniassammata.

Ataatsimiisitsineq naggaserlugu pikialaartitsinernut tupersuaq saqqummiunneqarpoq, pernaammillu septembarimi atoqqaartinneqassalluni.

 

sisimiuni suliniutit 950px 02

Ivigaaraasanik arsaattarfissaq ukioq manna aasap ingerlanerani naammassissaaq. (ass./foto: Qeqqata Kommunia / Unisport)

 

sisimiuni suliniutit 950px 03

Spejderit illuutaata Nalunnguarfiullu eqqaani beachvolley-rtarfissaq aasap ingerlanerani naammassissaaq.

 

sisimiuni suliniutit 950px 04

Silami timersortarfissaq aasap ingerlanerani naammassissaaq. (ass./foto: NunaGIS)