Sisimiuni ilinniarnertuut

Ukioq manna GUX-imi ilinniarnertuunngortut siornarniit karakterit angusarineqarsimasut marloriaatinngorlugit pitsanngoriartippaat. (ass./foto: Johannes Ujo Müller)

 

Marlunngornermi juunip 26-ani Sisimiuni ilinniarnertuut allagartartaatik tiguaat. Siornarniillu marloriaammik angusarissaarnerupput.

KTI-p inersuaaraani allagartartaarneq ingerlanneqarpoq, ilaqutaasut ikinngutaasullu tulluusimaaqalutik ilinniarnertuut 48-t allagartartaarneri malinnaavigaat.
- Tulluusimaaqaanga, ilissilumi tulluusimaarutissaqarpusi. Ukioq manna karakterit 12-it 41-ruupput, karakter 10-llu 55-iullutik, tamannalu ajunngeqaaq. Suli itisileqqissaarlugu misissuinngikkaluarlugu oqarsinnaavunga siornarniit marloriaammik pitsanngoriarsimammata, oqarpoq GUX-imi rektori Poul V. Jensen.

Poul V. Jensenip ilinniarnertuunngortut pilluaqquai naammassisunullu ersarissaatigalugu GUX nammassigaluaraat ingerlariaqqinnissaminnut ilinniarnissaviat aatsaat aallartilersoq, ukiunilu pingasuni ilikkakkatik atorluassagaat kaammattuutigalugu.

 

Nersornaaserneqartut

Siullermik Qeqqata Kommunianiit ilinniarnertuuni angusarissaarnerpaaq Tanja Karing 5.000 koruuninik akissarsitinneqarpoq, taamatuttaaq Nunafondenimiit angusarissaarnerpaajulluni 10.000 koruuninik akissarsitinneqarpoq agguaqatigiisillugu angusarimmagu 11,6.
Angusarinnerpaat aappaattut naligiillutik akissarsitinneqarput Ane Sofie Mølgaard Frederiksen aamma Lula Olsen Müller agguaqatigiisillugu 10,6 angusimammassuk. Tamarmik 4.000 koruuninik akissarsitinneqarput.
Ukiuni pingasuni atuanngitsuunngiivissimasutut sulianullu tunniussiuaannartutut 10.000 koruuninik akissarsitinneqarpoq Lula O. Müller, aappaattullu 5.000 koruunik Ulloriaq K. Lennert.

Ilinniartitsisut tungaanniit ilinniarnermi tunniutiinnarnaveersaarluni sukataarluarsimasutut toqqagaavoq Isak Lyberth, aamma eqiasuittutut suliumatuutullu Lula O. Müller toqqarneqarpoq.
Nunafondenimiit qilanaartuutitut oqaatigineqarpoq aappaagumiit kammalaatitsialattut 5.000 koruuninik akissarsititsisalerumaarlutik.

Nersornaasiisoqareermat nerisarfimmi kaffisoqatigiittoqarpoq, kingornalu nalunnguarfiup eqqaanut tasiorlutik ingerlaaqatigeeriarlutik ataatsimut assiliseqatigiipput.

ilinniarnertuut 2018 950px 02

Saamerlerniit Ulloriaq K. Lennert ilinniarnermini paarinnilluarnerpaaq aappaattut, Ane Sofie Mølgaard Frederiksen angusarissaarnerpaat aappaattut (10,6), Tanja Karing angusarissaarnerpaatut (11,6), Lula O. Müller angusarissaarnerpaat aappaattut (10,6), atuanngitsuunngiivissimasutut sulianullu tunniussiuaannartutut kiisalu atuartuni maligassiuilluartutut pineqartut akissarsitinneqarput.  (ass./foto: Johannes Ujo Müller)

 

ilinniarnertuut 2018 950px 03

Ilinniarnertuut 48-t ilaqutai ikinngutaalu KTI-mi ataatsimoorput. (ass./foto: Johannes Ujo Müller)

 

ilinniarnertuut 2018 950px 04

Ilinniartitsisut tungaanniit ilinniarnermi tunniutiinnarnaveersaarluni sukataarluarsimasutut toqqagaavoq Isak Lyberth. (ass./foto: Johannes Ujo Müller)

 

ilinniarnertuut 2018 950px 05

(ass./foto: Johannes Ujo Müller)

 

ilinniarnertuut 2018 950px 06

(ass./foto: Johannes Ujo Müller)