Sisimiuni perorsaasunngortut 15-it

Najugaq qimannagu perorsaasutut naammassisut 15-it. (ass./foto: Jens Peter Møller)

 

Najugaq qimannagu perorsaasutut ilinniartut 15-it sisamanngormat maajip 31-ani naammassipput.
Naammassinerat malunnartinniarlugu Taseralimmi ilaqutaasut qaaqqusallu assigiinngitsut peqatigalugit nalliussineqarluni.
Taamani ilinniarniarlutik qinnuteqartut 80-iusimasut akornanni 21-it toqqagaallutik ilinnialerlutik aallartissimapput. Tamangajammik isumaginninnermut ikiortitut ilinniagaqareersimapput, ilaallu misilittakkatik sulisimanertillu aallaavigalugit toqqarneqarsimallutik.

- Maanna 15-iullusi ilinniarneq angusaqarluarlusi naammassivarsi. Ilinniaqatisi marluk peqquteqarlutik kingusinnerusukkut naammassinissaat naatsorsuutigaarput. Inulerinermi misilittagaqarlusi aallartippusi, ilinniarnermi atorluakkassinnik. Ilikkagaqarusunneq angusaqarusunnerlu takutittuartarsimallusiuk, oqarpoq Immikkoortortami pisortaq Ole Lennert.

Naammassisut imminut piumaffiginninneq, suleqatigiinneq tapersersoqatigiinneq unammillernartullu assigiinngitsut peqatigiillutik anigorniartarsimavaat.

- Maanna amerlanerit suliffittaareerput, neriuppugullu ilinniarsimasasi suleqatigiligassasi peqatigalugit atorluarumaarisi, ineriartortillugit annertusiartortillugillu piumasaqaatinut naammassilluarumallugit. Pisariaqartinneqaqaasimi, Ole Lennert oqarpoq.

Ukiut qulinngulersuni Sisimiuni perorsaasut 54-it ilinniartinneqarsimalereerput. Ukioq manna perorsaasutut ilinnialerumallutik qinnuteqartut 67-iupput, taakkulu akornanni 23-it ukiamut ilinniarlutik aallartissapput.
Ilinniarneq Qeqqata Kommunia PI SPS-ilu akornanni suleqatigiinnikkut ingerlanneqarpoq.

Perorsaasunngortut: Petrine Jonathansen, Malik Larsen, Anna Q. Siegstad, Nanna Andersen, Akutaq Olsen Hansen, Augustine M. Larsen, Charlotte Olsen, Helene Willumsen, Erninnguaq I. Frederiksen, Mona Bourup, Amalie Dahl, Aja Abo Steenholdt, Lillian Lennert, Tabitha Kleist, Elvira Lundblad.

 

perorsaasunngortut 2018 950px 04
Ole Lennert immikkoortortami pisortaq naammassisunut oqalugiarpoq. (ass./foto: Jens Peter Møller)

 

perorsaasunngortut 2018 950px 03
(ass./foto: Jens Peter Møller)