Umiatsianik takutitsinersuaq

AMS-ermiut umiatsiat assigiinngitsut Suzuki-nik motoorillit tuniniarpaat. (ass./foto: Johannes Ujo Müller)

 

Arfininngormat Grønlandsbankip eqqaani umiatsiarpassuit motoorerpassuillu suliffeqarfinniit assigiinngitsuniit ussassaarutigineqarput.
Seqinnarissuugaa sila suli nillasukkaluartoq Grøndlandsbankip qeqqanilu Brugseneeqqap eqqaani umiarsianik takutitsisoqarlunilu tuniniaasoqarpoq. Tuniniaasuupput Sisimiut illoqarfiani umiatsianik tuniniagaqartut.
Sivdlek-p tuniniaasuni akisussaasut apersoramigit, namminneq tuniniagaat suut allanit immikkuullarissutigineraat oqaluttuaraat.

 

AMS

AMS – Auto Marineservice-center A/S tuniniagaasa ilagaat Nunatsinni umiatsiaaqqani atorneqarluarnerpaat ilaat Poca. Poca 1967-imili sanaartorlugit aallartissimapput, ukiullu ingerlanerini inerisartuarsimallutik. Kalaallit Nunaat tamaat isigalugu Poca-nik umiatsiaaraatillit katillugit 4.000-it missaanniittut sannavimmi ittuusoq tuniniaasorlu Kim Christensen nassuiaavoq. AMS-ip motoorit Suzuki tuniniagaraat iluarsaattuussinermillu kiffartuussisarlutik.
Umiatsiat motorilereerlugit neqeroorutigineqarput.

 

Bifrost Motors

Illoqarfitsinni suliffeqarfiit nutaat ilaat Bifrost Motors angallat “Qooqa” 400 hk-imik motorilinik takutitsissutigalugu ussassaarutigaat. Umiatsiaq Qooqa Askeladden-imit suliarineqarsimavoq, nassuiarneqarneralu malillugu Nunatsinnut 100%-imik naleqqussagaalluni. Piniartut qanimut suleqatigalugit ilusilersorneqarluni suliaasimavoq, angallatiniillu allanit sanilliullugu 30 procentimik oqimaanneruvoq, taamaasilluni sikusiornermut ninngusuujulluni. Bifrost Motorsip piginnittuata Maannguaq Philip Lauritzen-ip ullormi ussassaarinerminni immikkuullarissutit oqaatigaa kisiartaallutik ukioq manna 400 hk-ilimmik motoorilik Qooqa tuniniarlugu, motorialu tassaavoq Mercury.

 

Sirius Greenland

Biilit unittarfianni takutsitsivittut atorneqartumi umiatsiaateqarnerpaallutik takutitsisut tassaapput Sirius Greenlandimeersut. Piginnittoq Bo Lings isumaqarpoq namminneq arlariinnik qinigassaqarnerullutik, soorlu ilaqutariinnut angallatitut, nuannaariartaatitut inuutissarsiuteqartunullu atorneqarsinnaasunik neqerooruteqarlutik. Atortut tamaasa ilanngutereerlugit tuniniagaqarnertik ussassaarutigaat.
Sirius Greenland motorit Yamaha-t illoqarfitsinni tuniniagaraat iluarsartuussinermillu kiffartuussisarlutik. Bo Lings oqarneratuut Kalaallit Nunaanni umiatsiaatillit 60 procentii Yamahanik motorilinnik angallateqartut.
Sirius Greenlandip umiatsiaq Qooqa aamma tuniniagaraa, Yamahamik 300 hk-imik motoreqarluni. Takutitsinerminni umiatsiaq tunineqarpoq.

Tuniniaasut saniatigut GrønlandsBanken ammavoq, piserusuttullu ingerlaannaq bankiminnut saaffiginninnissaminnut periarfissikkumallugit piareersimallutik.

 

Umiatsianik takutitsinersuaq 950px 02
Sirius Greenland-ip umiatsiaaqqaniit nuannaariartaatinut anginernut assigiinngitsut tuniniarpaat. (ass./foto: Johannes Ujo Müller)

 

Umiatsianik takutitsinersuaq 950px 03
Bifrost Motors umiatsiaq “Qooqa” Mercury 400 hk-ilerlugu ussassaarutigalugu tuniniarpaat. (ass./foto: Johannes Ujo Müller)

 

Umiatsianik takutitsinersuaq 950px 04
Suliffeqarfiit pingasut umiatsianik tuniniakkaminnik tuniniaatigalutik arfininngormat takutitsipput. (ass./foto: Johannes Ujo Müller)

 

Umiatsianik takutitsinersuaq 950px 05

Tuniniaasut saniatigut GrønlandsBanken ammavoq, piserusuttullu ingerlaannaq bankiminnut saaffiginninnissaminnut periarfissikkumallugit piareersimallutik. (ass./foto: Johannes Ujo Müller)