Sisimiuni issittumi pinngortitap naasuinik naatsiiviliortoqassaaq aammalu Kalaallit Nunaata pinngortitaanik meeqqanut ilinniartitsissutaassalluni

All. Anna Ida H. Jonsson

 

Kalaallit Nunaanni pinngortitaq kisimi iluliaqaranilu sermersuaqanngilaq. Ikittuinnaat ilisimasaqarfigisaannik naasorpassuaqarpoq. Tamanna peqatigiiffiup nutaap allanngortinniarpaa. Peqatagiiffik Sisimiut qeqqani issittumi pinngortitap naasuinik naatsiiviliorniarpoq. Pinngortitap naasuinik naatsiivissaq pinngortitatta kusanassusaanik meeqqanut soqutiginnilersitsissaaq, naatsiivillu aqqutigalugu nunatta naasuinik ilikkagaqartassapput. Peqatigiiffik suli pisortatigoortumik pilersinneqanngilaq, kisiannili maajip qeqqata missaani ornigarneqarluartumik paasissutitsiinertalimmik ataatsimiittoqarpoq, tassani Kirsten Brummerstedt, issittumi pinngortitap naasuinik naatsiiviliornissamut aallarniisoq isumassarsiamut tunuliaqutaasoq oqaluttuarivaa aammalu Kalaallit Nunaata pinngortitaa pillugu annertuumik ilisimasani avitseqateqarluni.

Kirsten ukiorpassuarni pinngortitamik soqutigisaqarnini ikinngutiminik nalunngisaminillu avitseqateqartarsimavoq, sivisuumilli pinngortitaq pillugu ilisimasaminik soqutiginnilluarnerminillu amerlanerusunut ingerlatitseqqiinissani sinnattorisimavaa. Peqatigiiffiup inuit nunatsinni pinngortitamut soqutigisallit katersorusuppai, naatsiivissarlu kinguaariinnut tulliuttunut soqutiginninneq ingertitseqqiinissamut atorusullugu. Issittumi pinngortitap naasuinik naatsiivissaq illoqarfiup innuttaasui peqatigalugit pilersinneqassaaq, taamaammallu peqatigiiffiup ilaatigut qaqqaliarluni naatsiivimmiittussanik naasortartitsinermik aaqqissuiumaarpoq.

Peqatigiiffik sisamanngornermi maajip ulluisa 31-ianni nal. 17.00 Amerlummi pilersitsivusumik ataatsimiisitsissaaq.
Kikkut tamarmik peqatigiiffimmut soqutiginnittut peqataanissaminnut ataatsimiigiarnissamut aggersarneqarput.

 

Arktisk botanisk have 950px 02