Maajimi peqqissuusa aamma utoqqaat angerlarsimaffiani

(foto: Sisimiuni Utoqqaat Angerlarsimaffiat)

 

Maajimi Peqqissuusa qulequtaralugu aaqqissuussinerit assigiinngitsorpassuit akornanniippoq utoqqaat angerlarsimaffiani sammisassaqartinneqarneq.
Alutorineqarluartumik siornatigorniit nutaarsiassaralugu kalaallit pinnguaataat assigiinngitsut sammineqarput. Arsaaqqat, eqitaq aamma ajagaq atorlugit ulutorineqartumik najugaqartunut sammitinneqarput, taamatuttaarlu pakassumminneq, ballonimik unammineq appelsiinalu alussaammiittoq nakkartinnaveersaarlugu sukkaniunneq.

Unammiuaartitsinermi peqataasut semi-finalimut anngunniutsinneqarput, illersuisullu qiimmassaallutik nippaarilluaqaat.

Utoqqaat angerlarsimaffiani Maajimi peqqussuusamik sammisaqartitsineq ukiut sisamassaraat.
- Ukiormanna maajimi peqqissuusami suleqatigiisitaq aatsaat taama ilaasortaqartigaaq aammalu alutornartumik aaqqissuussami nutaarsiaraarput kalaallit pinnguaataat arsaaqqat, eqitaq, ajagaq atorlugit sammisaqartitsineq. Tulluusimaarutigeqisatsinnillu sulisutta Johan Kleist nammineq kajumissutsiminik pinnguaatit taakku nammineerluni sanavai, nuannarineqarlutillu alutorsaatigineqaqaat, oqarpoq utoqqaat angerlarsimaffiani ningiu Paneeraq Grønvold Samuelsen.

 

Sammisassat allat

Immikkut aaqqissuussat saniatigut ataasinngornermiit tallimanngornermut ullaap tungaani ualikkullu ulluunerani ornittagaq (Dagcenter) najugaqartunut avataaniillu pulaartartunut sammisaqartitsisarpoq.

Ukiup ingerlanerani makku ilaatigut sammisassaasarput eqaarsaarnerit, banko, assassorneq, igaasariarneq, meeqqerivinniit pulaartoqarneq, sømandshjemmemut, Taseralimmut, timersortarfimmulluunniit kaffisoriarnerit, busseqattaarnerit, bowling, nakatarnerit, aalisariarnerit, Alanngorsualiarneq, Arctic Circle Race-p aallartinneqarnerani Taseralimmiinneq, unnuassiuaarneq ilaqutaasunillu ataatsimoortitsinerit assigiinngitsut aaqqissuusseqataaffigineqartarput.

- Najugaqartut qanoq issusaat apeqqutaallutik ullormut sammisassaqartitsinernut peqataasut amerlassusaat ullormiit ullormut assigiinngiiaarsinnaasarput. Nuannersut ilagisarpaat ilaqutaasut ilaquttaminnut namminerisaminnik aamma sammisassaqartitsillutillu susassaqartitsisarmata. Aammalu peqatigiiffiit assigiinngitsut namminneq kajumissusertik atorlugu utoqqaat illuannut ornigullutik aliikkusersuiartortartut qujanartaqalutik, oqarpoq. Paneeraq Grønvold Samuelsen.

Ulluni tulliuttuni sammineqartussat ilagaat nakartartitsineq, sulisut arpatsinneqarnerat, Nintendo Wii atorlugu unammineq, qaammallu naanerani naggataaqatigiinnermik nerersuaaqatigiissapput kalattullu qittattoqassalluni.

 

Utoqqaat angerlarsimaffiani maaji 950px 02

Anna aamma Louise pakassummillutik unammisut. / Anna og Louise I trækker armkrog. (foto: Sisimiuni Utoqqaat Angerlarsimaffiat)

 

Utoqqaat angerlarsimaffiani maaji 950px 03

Ballonit atorlugit unammersuartoqarpoq. / Storkamp med ballon som redskab. (foto: Sisimiuni Utoqqaat Angerlarsimaffiat)

 

Utoqqaat angerlarsimaffiani maaji 950px 04

Emilie appelsinstafet-ertoq. / Emilie I appelsinstafet. (foto: Sisimiuni Utoqqaat Angerlarsimaffiat)