iPad atuartunut iluaqutaava?

2014-imi aasakkut Qeqqata Kommuniani atuartut tamarmik iPad-inik agguaanneqarput.  (ass./foto: Johannes Ujo Müller)

 

Unnugu Minngortuunnguup atuarfiata inersuaani nal. 19:00 ilinniartitsisut innuttaasunut atuarfimmi oqallitsitsilerput.

Oqallissaarutaasussarlu tassaavoq 2014-imi aallarniutaasumik atuartut tamarmik iPad-eqartalerneraniit ullumikkumut qanoq atuartunut iPad sunniuteqarsimanersoq.
Qularnanngitsumik atuartut iPad-eqartitaarnertik nuannarissavaat, atornerannimmi periarfissanik assigiinngitsunik peqarluarmat. Ilinniartitsinermut tunngasunik app-eqarpoq, internertimut attaveqarnerminni paasissutissanik, nipilersuutinik filminillu immerneqarsinnaavoq, kiisalu nuannarineqarluartut ilaat spil-erpassuit assigiinngitsut.

Naak atuartitsinermut tunngasut pingaartillugit iPad-i app-inik imaqarnissaa maleruagassani allaqqagaluartoq, killeqanngiusattumik spil-inik aallertoqarsinnaaneq periarfissaavoq. Spil-it tassaasinnaapput pinnguaatigaluni ilinniutaasut aammalu aliikkutassiaannaasut ilinniarnermut tunngassuteqanngitsut.

 

Isummeqataallutillu oqalliseqataagit

Minngortuunnguup atuarfiani ilinniartitsisut paaserusuppaat angajoqqaat meeqqat iPad-eqartitaanerat nuannarineraat. Ilinniartitsisut atuartut iPad-eqartitaanerammita qanoq isumaqarfigivaat? Atuartut iPad-eqarnermikkut pikkorissinerulersimappat? Atuartut iPad angerlaattarnera ajoqutaava imaluunniit iluaqutaava?

Siorna atuisut apersorneqarlutik misissuititsisoqarnerani atuartut iPad-i atuartitsinermi atorluartaraat Qeqqata Kommunianiit paasineqarpoq. Ilinniartitsisut apersorneqartut 75 procentii akisimapput, tassani sapaatip akunneranut arlaleriarlutik iPad-i atuartitsinerminni atortarlugu.

Siorna misissuinermi paasineqarsimavoq iPad atuartut nammineernerulernissaannut ikiuutaasoq, tassani apersorneqartut 85 procentiisa oqaatigisimavaat. Atuartut oqallinnerulersimapput misissueqqissaarnerulersimallutillu. Ilinniartitsisut 97 procentii isumaqarput atuartut ukiut ingerlanerini digitalimik pisinnaasaat pitsanngoriarsimasoq.
Qularnanngilaq pappilissanik aqerluusanillu atuineq annikilleriarlunilu sipaarutigineqarsimassaaq.

Atuartulli pissarsiaat pitsanngoriaateqarsimappat qanoq annertutigisumik sunalu aqqutigalugu pitsanngoriaateqarsimanersut paaserusunneqarpoq. Pitsanngoriaataannaat kisimik eqqarsaatigineqaratik oqallinnermili ajoqutaasinnaasut aamma tusaarusunneqarput.

Minngortuunnguup atuarfiani ilinniartitsisut isummeqataanissat tusaarusullugu qilanaaraat, meeqqammi siunissaannut tamanna sunniuteqataasinnaammat.
Unnugu sisamanngornermi nal. 19:00 Minngortuunnguup atuarfiata inersuaani oqalliseqataajartorsinnaavutit.

 

ipad iluaqutaava 950px 02

Atuartut suliassaminnik ingerlatsinissamut ajornartorsiuteqartut ikiorniarlugit ilinniartitsisut ikiuulluartarput. (ass./foto: Qeqqata Kommunia)