Sarfannguani terianniaq perlerortoq toqunneqarpoq

(ass./foto: Johannes Ujo Müller)

 

Sarfannguarmioq terianniaq perlerorsimassangatitaa qimmimit toqunneqarsimasoq perlerortuunera misissorneqarmat paasineqarpoq.
Qaammatip siuliani Sarfannguani innuttaasut ilaat terianniamik takunnissimavoq, qanillattorsimammallu perlerorsimassangatillugu ilimatsaassimavaa. Kingorna Sarfannguarmiut qimmiutaasa ilaat terianniaq toqussimavaa. Teriannaq perlerornersoq misissugassanngortinneqarmat ilumut perlerortuusimanera paasineqarpoq.

 

Akiussutissamik kapitinneq

Maanna Sarfannguani qimmit tamakkerlugit kapitereersimalerput. Qimmit perlerornermut akiuussutissamik kapitereernermiit ullut 21-it kingorna perlerornermik nappaateqalersinnaanngillat, akiuussutissarlu taanna ukiut pingasut tikillugit atuuttarpoq.
UNIO-p erseqqissarusuppaa Kalaallit Nunaanni terianniat ilaat perlerornermik nappaateqarmata taamaammallu nappaammik inunnut ingerlateqqinneqarsinnaasumik tunillaassuisinnaasut. Taamaammat aamma innuttaasut oqartussallu akornani qimminik qitsunnilu akiuussutissanut kapoorinerit pillugit aallussilluarnissaq anguniarlugu suleqatigiilluarsinnaaneq pisariaqartoq oqaatigineqarluni.

 

Perlerortut qanillartornagit nalunaarutigikkit

UNIO-p innuttaasut kaammattorpai teriannianik pasinarsinnaasumik pissusilinnik takunnittut qanilliniartaqqunagit, taamatuttaarlu terianniamik napparsimasumik najugaqarfiup eqqaani imaluunniit qimmit eqqaanni takugaanni oqartussaasunut tamanna nalunaarutiginissaa eqqaamaqquneqarluni.

Uumasunik perlerornermik nappaateqarsinnaasumik ernumagisaqaraanni UNIO-p mailianut saaffiginnittoqarsinnaavoq uunga: Denne e-mail adresse bliver beskyttet mod spambots. Du skal have JavaScript aktiveret for at vise den.