Taseralik ukiuni qulinngortorsiorpoq

(ass./foto: Johannes Ujo Müller)

 

Sisamanngormat Sisimiuni kulturikkut illorsuaq ukiuni qulini nalliuttorsiornera malunnartinneqarluarpoq.
Nalliuttorsiornera atatillugu eqqumiitsuliortorsuaq ilisimaneqarluartoq Aka Høgh sisamap kingorna saqqummersitaminik saqqummersitsivoq. Saqqummersitsinermi Taseraliup paarlersua inunnik ulikkaavillugu malinnaaffigineqarpoq.

Unnukkut Nunatta Isiginnaartitsisarfiata Taseraliup nalliuttorsiornera atatillugu isiginnaagassiarisimasaa 'Akunnerit' nuannarineqarluartumik takuteqqaarneqarpoq.
Isiginnaagassiaq Laarseeraq Svendsenip erinarsugai assigiinngitsut erinarsorneqarlutik isiginnaartitsinermik akunnilertarlugit atorneqarput.
Isiginnaagassiap aallartinneraniit naanissaanut isiginnaartut nuannaaqalutik pattaatillattaarlutik isiginnaarput.

Isiginnaartitsinermik nipilersornermillu misilittagaqarluartut isiginnaartitsinermi peqataasut makkuupput: Karina Møller isiginnaartitsissusiami ilitsersuisoq, erinarsortuupput isiginnaartitsisuullutillu Nathan Kreutzmann, Kimmernaq Kjeldsen aamma Kuunu Berthelsen. Nipilersortuupput Jim Milne, Titken Jakobsen, Hanne Sandvig Immanuelsen kiisalu Anders Øgaard.

Taseraliup eqqaa Central Park

Isiginnaartitsisoqareernerata kingorna ilassinninnermik inersuit ilaanni naggaserneqarpoq. Qeqqata Kommuniani borgmesteri Malik Berthelsen aamma Naalakkersuisoq Doris Jakobsen Jensen ilassinninnermi oqalugiarnerminni innuttaasut tamarmik nalliuttorsiornermi pilluaqquaat.
Taseralik Sisimiut ilisarnaataasa pingaarutillit ilagilersimagaa borgmesteriup ilaatigut oqaatigaa.

- Taseraliup tamaanga inissinneqarsimanera isumaqarpunga torraanerusinnaanngitsoq. Taseraliup Nalunnguarfiullu eqqaanut Qeqqata Kommuniani takorluukkagut ima nuannertigipput allaat oqartoqarsinnaagunarluni siuniussami Taseraliup Nalunnguarfiullu eqqaa Sisimiut Central parkerilissagaa, soorlu New Yorkimi taamaattoqartoq, oqarpoq borgmesteri Malik Berthelsen.

Kulturikkut illorsuaq Taseralik allilerneqarluni sanaartorneqassaaq, nammassippallu Nipilersornermik ilinniarfik amma atuakkanik atorniartarfik nuunneqarumaarlutik.

Sapaammi kaffillerneq

Sisamanngornermi nalliuttorsiorneq ingerlanneqartoq sapaammi innuttaasunut tamanut kaffillernermik nanginneqarpoq. Taseralik inussaaleqinnguarani kaffillerpoq kaaginik sassaalliilluni, erinarsornermik akunniliisarluni qilaatersornermillu takutitsisoqarluni.

Taseralimmi pisortaq Arnajaraq Støvlbækip nalliuttorsiorneq qilanaarisimasaa nuannaarutigalugu tulluusimaarutigalugulu oqaatigaa.
Oqaaseqarnermini ilaatigut eqqaavaa neriuutigalugu Nunatsinni eqqumiitsuliortut ataqqineqarlutik naleqartinneqarlutilu suleqatigineqartarumaartut, eqqumiitsuliortunullu pissutsit pitsaanerusut anguneqarumaartut.

Nunatta Isiginnaartitsisarfiata isiginnaagassiaq 'Akunnerit' Taseraliup nalliuttorsiorneranut tunissutigaa. (ass./foto: Johannes Ujo Müller)

 

Taseralik kaffisorianik inoqarlualaavippoq. (ass./foto: Johannes Ujo Müller)

 

(ass./foto: Johannes Ujo Müller)

 

Taseralimmi pisortap Arnajaraq Støvlbækip sulisuni pikkorissut nersualaarpai. (ass./foto: Johannes Ujo Müller)

 

'Uanga Sisimiormiut nuannarisukuluujakkit, pikkigisukuluugassi inuusuttuaraallungali. Inivit eqiingasukuluut, tamarmik sullarissut', oqarpoq Aka Høgh.  (ass./foto: Johannes Ujo Müller)

 

Nunatta Isiginnaartitsisarfianeersut nipilersortuilu nersualaarneqarluarput. (ass./foto: Johannes Ujo Müller)

 

Pikkorilluinnartoq Kuunu Berthelsen Laarseeraq Svendsen ilaqutarivaa. (ass./foto: Johannes Ujo Müller)

 

Qeqqata Kommuniani borgmesteri Malik Berthelsen (ass./foto: Johannes Ujo Müller)

 

Naalakkersuisoq Doris Jakobsen Jensen (ass./foto: Johannes Ujo Müller)

 

Taseraliup Nalunnguarfiullu eqqaanut Qeqqata Kommuniani takorluukkagut ima nuannertigipput allaat oqartoqarsinnaagunarluni siuniussami Taseraliup Nalunnguarfiullu eqqaa Sisimiut Central parkerilissagaa, soorlu New Yorkimi taamaattoqartoq, oqarpoq borgmesteri Malik Berthelsen. (ass./foto: Johannes Ujo Müller)