Siunissamut eqqanaarsarneq isumatusaarneruvoq

Ilaquttat namminerluunniit illit kræftimik eqqugaasimallutit nunat qimallugu aallartariaqalersimallutit qanigisavit ilaginissaanut akiliutsinneqarsinnaavutit.
Ullumikkut tusarsaasorujussuuvoq inuppassuit annerusumik minnerusumilluunniit nappaassuarmik kræftimik napparsimalersimalersimallutik eqqugaasut. Oqartoqartarporlu kialluunniit nappaat taanna aqqusaarsinnaagaa, qanorluunniit peqqinnartumik inuuneqartutut misigigaluaruni.
Qujanavissumik inuit ilai nappaat taanna anigortarpaat, ilaqarporli aamma ikiorserneqarsinnaajunnaarlutik nappaat toqqutigiinnartarlugu.
Nappaammik eqqugaasoq ilaqutaalu inuunerminnik allannguerujussuartitsisinnaasarput, sillimaffiginagu naatsorsuutiginagulu eqqugaagaangamik.
Nunagisaq qimallugu peqqissartikkiartortinneqartarput, Nunattalu avataanut Danmarkimut amerlasuut peqqissartikkiartortarlutik. Eqqugaasut amerlanerit kissaatigisarpaat qanigisaminnik ilaqarnissartik, tamannami annertoqqutigisarmassuk pingaartumik tapersersorteqarnissaq pisariaqartinneqartarmat. Amerlasuulli kissaatigisartik piviusunngortinngitsoortarpaat angalanermut, ineqarnermut nerisaqarnermullu aningaasartuutit akisuallaarneri pissutigalugit.

Akiliutsissinnaaneq akikitsoq

Inuk kinaluunniit nappaammut eqqugaasinnaammat kajumissutsiminnik suliaqarlutik peqatigiiffimmik ingerlatsisut nappaammut eqqugaasumut ingiaqataasussamut aningaasartuutissaannut ikiorsiisinnaaneq periarfissiillutik aallartitsinikuupput. Peqatigiiffimmut ingerlatsisut tassaapput 'Neriuffiup ikinngutai'. Akiliutsinnissaq kissaatigineqarpat piumasaqaatituaavoq kræftimik eqqugaasoq ingiaqataasussarlu peqatigiiffimmut minnerpaamik ukiuni marlunni ilaasortaanissaat. Ukiumut akiliut ullumikkut 50-koruuninik annertussuseqarpoq. Tassa imaappoq ingiaqataasoq Danmarkimut siumut utimullu katillugit 10.000 koruuninik akiliutsissinnaavoq, taamaallaat ukiuni marlunni 100 koruuniinnarnik akiliisimagaluarluni. Ilaasortap akiliutsinnissani periarfissat pingasut arlaat toqqarsinnaavaa. Periarfissat tassaapput angalanermut, ineqarnermut kiisalu nerisaqarnermut akiliutsinneq.

Kingusinaarneq

Neriuffiup ikinngutaani siulersuisut arlaleriarlutik misigisarpaat inuit tassanngaannaq nappaammik eqqugaasimallutik aatsaat peqatigiiffimmut ilaasortanngorniarsarisarnerat.

Tamanna aamma SI.PE.NA-mi Sisimiuni perulullutik napparsimasut peqatigiiffiata misigisarsimavaat.
- Ajoraluartumik pisussaq nalusartik aatsaat nalleraangat ilaasortanngornialertarnerat ajornartorsiutaasarpoq. Taanna arlaleriarluta misiginikuuarput, ilaasortaanatik ikioqqugaluartut. Tassa aatsaat pisoqaraangat qanoq iliornialertarnerat takussaasarpoq, SI.PE.NA-mi aningaaserisoq Karen Lennert oqarpoq.

- Siunissarmi nalunaqimmat arlarput napparsimaleriataarsinnaavoq. Taamaammat immaqa inuit ikittuinnaat eqqanaarinninnissaminnut eqqarsaateqartarput. Kaammattuutiginarporlu peqqitsilluta nalunartut pillugit siunissamut eqqanaarinninnissaq, Sisimiuni Neriuffimmi siulittaasoq Judithe Johansen oqarpoq.

Qisuariaatit sakkortuut

Inuit ilai paatsuungassuteqarlutik sakkortusinnaasunik qisuariaateqarlutik siulersuisut nuanninngitsunik saaffigisarsimagaat siulersuisut oqaluttuarput.
- Misiginikorujussuuara qassiiliorfigitillunga. Soorlu nappaammik eqqugaasoq nammineq ilaasortaagaluarluni aappaasoq ilaasortaannginnera pissutigalugu ingiaqataanissaanut akiliutsissinnaanngikkaangat sakkortuumik qisuariarfigitittarsimavunga, Magdaline Lennert oqaluttuarpoq.
Qisuariaatit assingusut siornaak Sivdlek'-mi allaaserineqarnikuusumi 'Ikioqatigiiffimmiit' Illerfissarsiutileqatigiinniit aqqusaarneqartartut oqaluttuarineqarnikuupput.

'Ikioqatigiiffik' pillugu allaaserisaq uani atuarneqarsinnaavoq.

'Sisimiuni Neriuffik' aamma 'Ikioqatigiiffik' allaffeqarput Aqqusinersuaq 22-mi.

Sillimmasiineq

Siunissamut eqqanaarsarneq eqqartorneqarnerani GrønlandsBanken nammineq nappaatinut perulunnartunut sillimmasiineq periarfissaqartitsinera allaaserisami ilanngutinngitsoorusunnanngilaq. Imatut allaqqammat:
'Taamatut sillimmasersimaguit nappaammik perulunnartumik eqqugaariataassagaluaruit 163.000 koruuninik tunineqassaatit. Nappaat assersuutigalgu kræftiusinnaavoq, aanaartornerusinnaavoq imaluunniit nappaatit allat inuunermut navianarsinnaasut. Aningaasat taakku allatut katsorsartinnissamut atorsinnaassavatit, imaluunniit nunani allani katsorsartissaguit aapparisat tapersersortiginiarlugu ilagerusussagukku aningaasartuutissassinnut atorsinnaassavasi. Aamma illit sulisinnaanngikkallarninni imaluunniit katsorsartinnerpit nalaani aapparpit sulinngikkallarnermini aningaasarsiorunnaarallarnerani atorneqarsinnaapput.'
Taanna ukiumut 1.400 koruuneqarpoq. Annertunerusumik GrønlandsBanken attavigalugu paasiniarneqarsinnaavoq.

Sisimiuni Neriuffimmi siulittaasoq Judithe Johansen: Kaammattuutiginarpoq peqqitsilluta nalunartut pillugit siunissamut eqqanaarinninnissaq. (ass./foto: Johannes Ujo Müller)

 

Kræftimik eqqugaasoq peqqissariartortoq ilaginissaanut akiliutsinneqarsinnaavutit. (ass./foto: Johannes Ujo Müller)