SI.PE.NA matuinnarpoq

SI.PE.NA matulermat 60.000 koruunit Neriuffiup ikinngutaanut tunniuppai. Tunniussisuuvoq aningaasersisoq Karen Lennert, tigusisuullunilu Magdaline Lennert. (ass./foto: Johannes Ujo Müller)

 

Sisimiuni peruluttunut napparsimasunullu peqatigiiffik SI.PE.NA ukiuni arfineq pingasuni ingerlareerluni maanna matuinnarneqarpoq.
Sisamanngormat SI.PE.NA-mi siulersuisut matunertik avammut suaarutigaat, aningaasallu katersarineqarsimasut 60.000 koruunit Neriuffiup ikinngutaanut tunniunneqarlutik.
Peqatigiiffiup siunertarisimavaa kikkulluunniit Sisimiuni najugallit perulullutik napparsimalertut ilaqarlutik angalaqateqartalernissaat.
Ukioq 2010-mi februaarip 27-ani SI.PE.NA kajumissutsiminnik suliaqartunit pilersinneqarmat inuppassuit katersortarfimmut tunisiartorlutik tapersersuiartorsimapput.

- Aallartikkatta qiimmannartorujussuusimavoq, ukiulli sisamat ingerlaneranni soorlu qamikkiartortutut issimavoq, SI.PE.NA-p siulittaasua Else Berthelsen oqarpoq.
SI.PE.NA pilersinneqarmat taamanikkut Neriuffik ikinngutai suli pilersinneqarsimanngillat. Kræftimut eqqugaasut kisimik eqqarsaatigiinnarnagit aallanik aamma nappaateqarlutik napparsimasut eqqarsaatigalugit aningaasanik katersineq kajumissutsiminnik suliaqartut ingerlassimavaat.
Ilaasortaq ataaseq Danmarkimut akiliunneqarsimavoq, aapparisaa uummamminik suliaritikkiartortoq ilagiartorlugu.

2014-imili unittoorpoq

2014-imi januaarip qaammataani ataatsimeersuartitseriaraluaramik inukippallaarmat februaarimut kinguartissimavaat, neriullutik tullissaanut inussilluarnerujumaarlutik. Sunaaffali naamik. Inuit pingasuinnaat aggersimapput, iluamillu ingerlariaqqinneq ajulersimallutik.
Kingorna inuit akiliinissaminnut soqutiginnikkaluarlutik SI.PE.NA sumiinnersoq apersuutigisarsimagaluarpaat. Siulersuisoqanngimmallu tamanna pisinnaasarsimanani.
- Kisianni SI.PE.NA-p ingerlanerani misigisimavugut angusaqartarluta. Kommuni ataatsimeeqatigisarnikuuarput, Inatsisartullu attavigisarnikuullutigit. Taassumap kingorna uninngaannarata napparsimasut aallarunneqartartut pillugit eqeersaaqataasarsimavugut. Tusaaneqarsimasutut ippugut, tassa tamanna kingorna Inatsisartuniit qaqinneqarsimavoq akuerineqarlunilu. Susaarsimasutut misiginngilagut, siulittaasoq oqarpoq.

Neriuffiup ikinngutaanut aningaasat tunniunneqarput

Siulersuisuniissimasut aamma aallartiteqataasimasut inuit sisamat naaperiaramik aaliangerput aningaasat katersatik assingusumik suliaqartumut tunniunniarlugit.
- Peqatigiiffiup isumaanut qaninnerpaaq, tassa napparsimasut katsorsartikkiartorlutik aallarsimasut illersorusullugit tapersersorusullugillu aningaasat Neriuffiup ikinngutaanut tunniukkusullugit aaliangerpugut. Aningaasat 60.000 koruunit ikineqariarpata taava SI.PE.NA matuneqassaaq, Else Berthelsen oqarpoq.

Neriuffiup ikinngutaani siulittaasoq Sofie Mathiassen peqatigiiffimmut tassunga tunngasumik suliaqarnera pissutigalugu tunniussinermi peqataasinnaanngimmat peqatigiffik sinnerlugu Sisimiuni Neriuffimmeersoq Magdaline Lennert-ip aningaasat tunniunneqartut tiguai.
Peqatigiiffik sinnerlugu tunissuteqartut qutsavigineqarput, neriorsuutigineqarlunilu aningaasat tunniunneqartut atorfissaminnut atorluarumaartut.

Neriuffiup ikinngutaanut ilaasortanngorusuttut aningaaserisup normuanut uunga sianertoqarsinnaavoq 48 67 61.

SI.PE.NA-p siulittaasua Else Berthelsen-ip peqatigiiffiup ingerlanerani angusaqarluartarsimanertik oqaatigaa. (ass./foto: Johannes Ujo Müller)