Peqatigiiffilerineq ilungersunarsinnaasoq

Tapersersorneqartutut misiginani nikallornartorujussuuvoq. (ass./foto: Johannes Ujo Müller)

 

Sisimiuni peqatigiiffinnik ingerlatsineq siulersuisoqarniarnikkut ilungersunartorsiorfiusinnaanera peqatigiiffilerisut ilai isumaqarput. Sisimiut illoqarfiani peqatigiiffiit 50-it sinneqartut ingerlalluartoqarlunilu ingerlanerluttoqartoq Sunngiffimmi pisortap Fali Kleist-ip oqaatigaa.

- Peqatigiiffiit ajoraluartumik ilai ingerlaqqatarput. Pissutigalugu taakkua pimoorussillutik sulerusuttut ikitsuararsuusaramik. Assersuutigalugu ataasinnguarluunniit aallarsimaguni illoqarfimmut allamut nuulluni taava peqatigiiffik unittoorsinnaasarpoq. Timersoqatigiiffiit ilai aamma taamaattarput. Ukiut ilaanni siulersorneqarluarlutik qaffattarput, kisianni siulersuisut ingerlanerluleraangamik peqatigiiffiup ilaasortaqarnera unammisartullu angusaat annikilliartulertarluni, sunngiffimmi pisortaq Fali Kleist oqarpoq.

Ullutsinni saariarfissat, sammisassat aliikkutassallu amerlatsikkiartorneri malunnarsigaluttuinnartut sunngiffimmi pisortap maluginiarsimavai.
- Assersuutigalugu inuit tv kanalerpassuaqalernikuupput, internet, facebook allallu sammisassat atorneqartorujussuullutik. Naammattunik sammisassaqarnerat immaqa peqatigiiffilerinermut taamaasillutik tunulliussilaarsinnaasarput, Fali Kleist nassuiaavoq.

Sunngiffimmi pisortap ersarissarpaattaaq peqatigiiffeqartoq aamma ukiorpassuarni ingerlalluartunik.

Ikippallaarneq sulinartorujussuusinnaavoq

Sisimiut illoqarfiani ukiorpassuarni peqatigiiffilerinermik ingerlataqartut aallussilluartullu ilai ullutsinni peqatigiiffilerinerup ilungersunarsinnaanera misigisarpaat. Suliniutinut pitsaasunut soqutiginnillutik siuarsaaqataarusukkaluarlutillu siulersuisoqarnikkut ikiortissaaleqisarneq ulapinnarsinnaasoq misilittagallit ilaat oqaluttuarput.

- Nikallornartorujussuugami taamatut suliniaraluarluni soorlu tapersersorneqartutut misiginani, taamaalilluta piuamassuseerukkiartorneq aallartittarluni, SI.PE.NA-mi siulittaasoq Else Berthelsen oqarpoq.
2014-imi SI.PE.NA-mi siulersuisut ataatsimeersuariartaraluarlutik takkuttoqarneq ajornera pissutigalugu aningaasanik katersuiniarnerat unitsiinnartariaqarsimavaat. Maannalu peqatigiiffik matuneqarpoq.

- Peqatigiiffilerineq sulinartorujussuuvoq, iluanaarutillu killilerujussuusarlutik. Siulersuisuniittugut aamma nammineq pilliuteqartarpugut, kalaaliminiutigut imaluunniit kaagiliagut erliginnguarnagit katersuiniarnermi pilliutigisarnikuuagut, SI.PE.NA-mi siulittaasup tullia Nikoline Lundblad oqarpoq.

Sisimiuni Neriuffimmi siulersuisut peqatigiiffimmut tapersersuisoqartoq nalunngikkaluarlugu ilungersorlutik ilaasortassarsiortarnertik sapaatit akunneri tamaasa piffissamik atuiffigisarpaat.
- Uagut tassa ilaasortatigut nikippallaarata taamaaruusaaginnaq ingerlaleratta, ilaasortassarsiorfigilerparput sapaatit akunneri tamaasa bankortitsisarluta. Tamannalu ilaasortaqarniarnitsinni iluaqutigaarput, Sisimiuni Neriuffiup siulittaasuata tullia Magdaline Lennert oqarpoq.

Peqatigiiffilerinermik pikkorissartitsineq

Innuttaasut peqatigiiffilerinermik soqutiginnilerseqqinniarlugit peqatigiiffilerinermik tunngasumik Qeqqata Kommunia pikkorissartitsinissani siunissami qaninnermi pilersaarutigaa. Kommuni tamaat eqqarsaatigalugu nunaqarfiit ilanngullugit nukittorsaanissaq pilersaarutigineqarpoq.
- Peqatigiiffiit namminneq kiffaanngissuseqartuupput, FN-imi inuit piginnaatitaaffii naqisimaneqaratik killiligaanani oqaaseqarsinnaaneq aamma peqatigiiffimmi atuuppoq. Taamaammat peqatigiiffiit namminneq piginnaatitaanertik atorlugu ingerlapput, Fali Kleist oqarpoq.
Qeqqata Kommuniani peqatigiiffiit tamarmik ataatsimut ulloqartittalernissaat kommunimiit piareersaatit ilagigaat sunngiffimmi pisortap oqaatigaa. Ukiup kaajallakkiartornerani peqatigiiffiit ullussaat qaqugukkut tulluarnerpaajussanersoq paasiniarneqaleruttorpoq.

Sisimiut illoqarfiani peqatigiiffiit 50-iupput. Ilai ingerlalluarput, ilaallu ingerlaqqatarlutik, oqarpoq Fali Kleist. / (ass./foto: Johannes Ujo Müller)

 

Qeqqata Kommunia peqatigiiffilerinermut pikkorissartitsinissaq pilersaarusiorlugu ingerlappaa. (ass./foto: Johannes Ujo Müller)