Pissassarfik ammarneqarpoq

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig Pissassarfik pisortatigoortumik ammarpaa. (ass./foto: Johannes Ujo Müller)

 

Nuna tamakkerlugu inunnut innarluutilinnut sullissivik nutaarluinnaq ataasinngormat ammarneqarpoq. Inuit innarluutillit ilaqutaasut susassaqartullu qilanaarinnguatsiarsimasaat maanna ukiuni marlunni sanaartorneqareerluni piviusunngortinneqarpoq.
- Ulloq manna tulluusimaarlunga neriuuteqarluarlungalu qilanaarisimavara. Nuna tamakkerlugu inunnut innarluutilinnut sullissivissatta Pissassarfiup ammarneqarneratigut inuit innarluutillit atugaannik pitsaanerulersitsinissamut pingaarutilimmut malunnaatilimmullu alloriarpugut.
Pissassarfik, tassa sumiiffik nukissanik aallerniarluta ornittagarput. Taaguut pitsassuuvoq toqqagaalluarlunilu, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig ammaanermini oqarpoq.

Innuttaasoq pitsaanerusumik inuuneqalernissamut periarfissagissaarnerulernissaa innuttaasullu Danmarkimukartinngikkaluarlugit Nunatsinni pisariaqartumik ikiorserneqarnissamut periarfissaat pitsaanerulissasut Naalakkersuisumiit oqaatigineqarpoq.
Inunnut innarluutilinnut sullissivimmi sulianut immikkut ilisimasallit arlallit ataatsimut katersorneqarsimapput, taamatuttaarlu assigiinngitsunik suliallit ilisimasaminnik paarlaasseqatigiissinnaanerat ineriartortitsisinnaanerallu periarfissinneqarsimallutik.
- Ullumikkut ulloq pingaaruteqarluinnarpoq. Pissassarfik uagutsinnut Kalaallillu Nunaannut tamarmut sullissiviuvoq - ataqqinaatitut tiguara Pissassarfimmik pisortatigoortumik ammarsinnaagakku, Sara Olsvig naggasiivoq.

Illoqarfik sammisassarpassualik

Qeqqata Kommuniani Ilaqutariinnermut, isumaginninnermullu ataatsimiititaliami siulittaasup tullia Juliane Enoksen oqaaseqarami Pissassarfimmi atorfinissimasut Sisimiunut tikilluaqquai, illoqarfiullu assigiinngitsorpassuarnik periarfissagissaarnera noorlaanut ilisimatitsissutigalugu.
- Sisimiut najugaqarfigalugu suliffigalugulu nuannersorujussuuvoq. Sisimiuni sunngiffimmi sammisassarpassuaqarpoq, nunataalu nuannersorujussuulluni. Qimussersinnaavusi, snescooterersinnaavusi, aavariarsinnaavusi, angalaarsinaavusi, sorpassuarnik Pissassarfiup saniatigut pissassaqqissinnaavusi, oqarpoq Juliane Enoksen.

Pissassarfimmi ningiuugallartoq Martha Labansen-ip ullormi ammaanersiornermi ullorsiornertik nuannaarutigaattaaq, piareersagassallu kingulliit piariiliivittut ilisimatitsissutigalugu.
- Piariilinngitsuunngilagut, kisianni piariilingajaavippugut. Atorfinitsitassagut aamma ingerlarujoorput. Taanna qilanaarutitta aamma ilagivaat, atorfinittut soorunami aamma tamarmik inissinneqartariaqaramik, Pissassarfimmi ningiuugallartoq Martha Labansen oqarpoq.

Nalunaaqutaq ataatsinut ammaanersiornermi qinikkat, susassaqartut, Tapiitsunut isigiarsuttunullu peqatigiiffik aamma qanigisaasut peqatigiiffiat peqataasunut ilaapput. Nalunaaqutarlu pingasunut tamanut ammarneqarluni kaffillertoqarpoq, Pissassarfiullu illutaa takuniarneqarsinnaalluni.

Pissassarfik nutaalianik sungiusaatinik atortorissaarluarpoq. ass./foto: Johannes Ujo Müller)

 

Ini sungiusartarfiit ilaat. (ass./foto: Johannes Ujo Müller)

 

Qanigisaasut peqatigiiffianni siulittaasoq Benny peqatigiiffik sinnerlugu ammaanersiornermi oqaaseqarpoq. (ass./foto: Johannes Ujo Müller)

 

Kaffisoriat ilaat. (ass./foto: Johannes Ujo Müller)

 

Pissassarfimmi ningiuugallartoq Martha Labansen.  (ass./foto: Johannes Ujo Müller)

 

(ass./foto: Johannes Ujo Müller)

 

Kaffisoriat ilaat. (ass./foto: Johannes Ujo Müller)