Tilioq ammaanersiorpoq

(ass./foto: Johannes Ujo Müller)

Tapiitsunut isigiarsuttunullu peqatigiiffik, qanigisaasut peqatigiiffiat naalakkersuisorlu ataatsimut ammaanersiornermi assiliseqatigiipput. (ass./foto: Johannes Ujo Müller)

 

Innarluutillit illersuisoqarfiat Tilioq ataasinngormat ammaanersiorpoq. Soorlu Pissassarfik ulloq taanna ammarneqarmat Tilioq, allakkeriviup qulaani allaffeqartup, siulliulaarluni aqqanernut ammaanersiorpoq.

Sisimiut illoqarfiani pingaarutillit marluk ataasinngormat ammaanersiortinneqarmata inuppassuit najuullutik persuarsiorput.
Sisimiormioq Christina Johnsen Innarluutillit illersuisuatut siorna novembarimi atorfinitsinneqarpoq. Christina Johnsen inatsisilerituutut ilinniagaqarpoq misilittagaqarluarlunilu.
Inuit Innarluutillit illersuisussaanik pilersitsinissaq 2017-imi upernaakkut ataatsimiinnermi Inatsisartunit aalajangiunneqarpoq. Inuit Innarluutillit illersuisuat inuit innarluutillit taakkulu qanigisaat sinnerlugit oqaaseqartartuussaaq. Inuit Innarluutillit illersuisuat ilaatigut pisinnaatitaaffiit naammagittaalliuuteqarsinnaanerlu pillugit siunnersuillunilu ilitsersuisassaaq kiisalu inuit innarluutillit atugarisaannik siuarsaallunilu qitiutitsissalluni.

Oqaaseq TILIOQ arlalinnik ajunngitsunik isumaqarpoq. Tilioq tassaasinnaavoq "kammak", imaluunniit oqqersuummik isumaqarsinnaalluni. Oqaaseq taannarpiaq oqqersuutaasinnaasoq tulluartutut naliliiffigineqarsimavoq, "illersuisup" suliassaasa ilagimmassuk allat sinnerlugit oqariartuuteqartarnissaq allanilluunniit oqariartorfigineqarsinnaasoq. Ateq nassaarineqarpoq atuakkami "Kalaallit Aqqi", Nuka Møller-imiit.

 

Angajoqqaat ineriartornermigut akornutilimmik meerallit peqatifiiggiani siulittaasup Benny Kokholm-ip Tilioq ammaanersiornerani tunissuteqarfigivaa. (ass./foto: Johannes Ujo Müller)

 

Christina Johnsen aamma Sara Olsvig ulloq ammaanersiorfik persuarsiornartumik atorpaat. (ass./foto: Johannes Ujo Müller)

Tilioq allakkeriviup qulaani allaffeqarfeqarpoq. (ass./foto: Johannes Ujo Müller)