Kinguaassiutitigut kanngutsaatsuliortut tamatta akiortigit

(ass./foto: Johannes Ujo Müller)

(ass./foto: Johannes Ujo Müller)

 

Pisiniartitsisut taxa-rtartullu meeqqat meeqqanik ingerlanerluttunik ulluinnarni takunnittartuusut suleqataanerusariaqartut ilaatigut ataatsimiisitsinermi peqataasunit siunnersuutigineqarpoq.

Sapaatip akunnerata siuliani Sømandshjemmemi meeqqat kinguaassiutitigut kanngutsaatsuliortittarnerat akorniarlugu innuttaasunut ataatsimiisitsisoqarnerani inuit 40-t soqutiginnillutik peqataapput. Ataatsimiisitsinermilu kinguaassiutitigut kanngutsaatsuliortarnernik pinaveersaartitsinissaq qitiutillugu oqallisigineqarpoq.
Nakuusa nuna tamakkerlugu paasititsiniaanermi "Ullut Tamaasa" tunngavigalugu ataatsimiisitsisoqarnerani kanngutsaatsuliornerit pillugit ilaqutariit akornanni isertuussisoqartarnera Bormesterimit alianartutut isigineqarpoq.
- Kinguaassiutitigut kanngutsaatsuliortarnerit Qeqqata Kommunianit unitsinniarpagut, uagut inersimasutut suliassarput annerpaaq tassaavoq, meeqqanik illersuinissaq, Qeqqata Kommuniani Malik Berthelsenip tikilluaqqusereerluni aallarniinermini taamatut oqaaseqarpoq.

Kinami illersuisuussava?

Oqallinnermi ilaatigut apeqqutit imaattut qaqinneqarput:
Inersimasoq meeqqamik illersuinngippat, taava meeraq meeqqatulli allatut pitsaasumik inuuneqarnissaanut kina illersuisuussava? - meeraq unnuakkut sinissinnaaqqullugu, kina illersuisuussava? Nipangersimaannarnikkut meeqqap atornerlunneqaqqinnginnissaa qanoq isilluta qulakkiissavarput?
Atornerluisoqannginnissaa qulakkeerniarlugu kiisalu pinaveersaartitsiniarluni, kommuni qaammatini kingullerni suliat akimorlugit sulianik ingerlataqarpoq.
Innuttaasunik ataatsimiisitsinermi Politikommisær Karl Jørgen Lennert aamma peqataavoq, unnerluussummillu tigusaqarsimatillutik, qanoq politiit suleriaaseqartarnerinik oqaluttuarluni.

Ajornartorsiutit qaangernissaannut ataatsimooqatigiinnissatsinnik politeeqarfimmiit kaammattuisoqarpoq.
- kinguaassiutitsigut kanngutsaatsuliortarnerit meeqqanik annertuumik eqquisartut pillugit suleqatigiissaagut, politikommisæri Karl Jørgen Lennert oqarpoq.
Kanngutsaatsuliornarnerit inunnut ataasiakkaanut qanoq kinguneqarsinnaaneri inuullu inuuneranut kinguniperlutsitsisarneri t avatangiisinut qanoq sunniuteqartarneri pillugit miljømedarbejderi Angerlarte Enoksen saqqummiivoq.
Ataatsimiisitsisoqarnerani peqataasut ilai isumassarsianik saqqummiussaqarput. Siunnersuutit ilagivaat pisiniarfinni sulisut meeqqanik ingerlanerluttunik arlaleriarlutik isiginnittuusarmata peqataatinneqarnissaat. Taamatuttaaq siunnersuutigineqarpoq taxaatilinnik peqataatitsineq, soorlu qanoq pitsaanerpaamik ikiuisinnaanerinik pikkorissartinneqarnissaannik neqeroorfigineqarsinnaasut.

Tamatta unnerluussisussaatitaavugut

Assersuutigalugu affarlit fiistappata imerlutillu, namminerlu nalunagu meerartaqartut, taava innuttaasut pasitsaassaminnik unnerluussisussaatitaasut erseqqissaatigineqarpoq. Meeqqat erngertumik ikiorserneqarnissaat anguniarlugu, teknikkikkut ikiuutinik ineriartortitsinissaq siunnersuutigineqarpoq. Taamatuttaarlu siunnersuutigineqartut tamarmik kommunimit katersorneqarput suliallu akimorlugit suleqatigiissitanik suliamik ingerlatitseqqissallutik. Suliniutit tamakkua 2018-imi februaarip 21-ani kommunalbestyrelsip "Qeqqata Kommuniani meeqqat inuunerissut"-mik sammisaqarnerini saqqummiunneqassapput.

Innuttaasut meeqqanik sumiginnagaasunik pasitsaassaminnik unnerluussisussaatitaasut ataatsimiinnermi erseqqissaatigineqarpoq. (ass./foto: Qeqqata Kommunia)

 

Siunnersuut: Taxaatilinnik peqataatitsineq, soorlu qanoq pitsaanerpaamik ikiuisinnaanerinik pikkorissartinneqarnissaannik neqeroorfigineqarsinnaallutik. (ass./foto: Johannes Ujo Müller)

 

Meeqqat ullut 2017. (ass./foto: Johannes Ujo Müller)