Timersullammaat 2017

Ukiut tamaasa Sisimiuni kunngit pingasuni timersullammannik toqqaasarneq aaqqissuunneqartartoq ingerlanneqarpoq.

Nersornaasiisarnerup siunertaa pitsaasutut Qeqqata Kommuniata borgmesterianiit Malik Berthelsenimiit oqaatigineqarpoq.

Timersortartut tamaasa borgmesterip nersualaarpai, Sisimiut illoqarfia sinnerlugu unammiartoraangamik illoqarfik avammut kusanartumik nittarsaattarmassuk. Minnerunngitsumik timersoqatigiiffilerinermik sungiussaanermillu ingerlatsisut nersorniarlugit inersuarmi nikuisinneqarput.

Medajlet 2016-imiit sanilliullugit ukioq 2017 ikinnerugaluarlutik guldit pissarsiarineqartut amerleriarsimapput.

Oqaatigaattaaq Qeqqata Kommuniani innutaasut nunatsinni peqqinnarnerpaamik inuuneqalernissaat anguniarlutigu, peqqinnermut politikkissaq maanna kommunimiit suliarineqartoq, naatsorsuutigineqarlunilu qanittumi peqatigiiffinnut tusarniutigineqarnissaa.

Sisimiuni Taekwondortartut akunniliillutik takutitsipput, taamatuttaarlu Sisimiuni tilluuttartut tilluunnermik takutitsillutik. Nipilersortuupput Pele, Hilda & Lars Frederik kiisalu inuiattut erinarsuuterput erinarsoqatigiit Malik ”Nunarput utoqqarsuanngoravit” atorlugu.

Pisarnertut Sisimiuni timersortarfik inuppassuarnik ulikkaarpoq, nerriviit issiaviillu piareersarneqarsimariaramik Timersoqatigiiffik ”Eqartoq”-kkut kaffimik tiimillu sassaalliisuupput.

Timersullammak

Lars Lennert Abelsen inuusuttuaraallunili Taekwondo aallutilernilersimavaa, ukiunilu arlalinni nunanut allanut unammiartortarnikuusimavoq. Ukioq 2017-imi unammissutit arfinillit peqataaffigigamigit angusarisimavai guldit arfinillit, nunanullu allanut unammisartutut toqqagaalluni. Unammersuarnermi stormesterinngorpoq.

Timersuutiminut pikkoriinnarnani timersuutimi tunngaviusumik malitassarisassai ulluinnarni malippai, inoqatiminullu takutitsilluartarluni ataqqinnittuulluni.

Timersuutimi saniatigut sungiusaasuuvoq pimoorussilluni nukissarlu annertooq sungiusarnernut timersuutiminullu atortarlugu.

Timersortartorpalaartumik unammiuaarnerni pissuserissaartarpoq.

Piukkunnaatilik

Bjarne A. Andersen, 15-inik ukiulik, timersuutinut marlunnut tunniusimalluarluni aammalu pingaartitsilluni pikkoriffigalugillu ingerlataqarpoq. Nunatsinni pissartanngorniunnerni angusarissaartarsimavoq, soorlu siorna S-68 sinnerlugu assamik arsaannermi futssalimilu pissartanngoqataavoq, silami arsaannermi sølvinnaqataasimavoq, pissartanngorniunnernilu tamani ukiup hold-ianut (årets hold) toqqagaaqataasarsimalluni.

Ukioq manna Arctic Winter Games-imut peqataanissaminut toqqagaavortaaq.  

Bjarne A. Andersen timersortarfiup avataani pissuserissaartuunera timersortartoorpalaartumillu inussiarnersumik ataqqinnittumillu pissuseqarnera toqqagaaneranut aaliangiisuusimapput.

Mikinerulluni aallaamasuunera pissutigalugu timersornermik siunissaqarnissaa apeqquserneqartarsimagaluartoq, maanna takutikkaa meeqqap ineriartornera qanoq pitsaanngoriartortigisinnaanera aaliangiisartuniit maluginiarneqarpoq.

Maligassiuisoq

Ane Lyberth Olsen silami pinngortitamilu timersornermi ingerlataqartuuvoq. Ukiup qanoq ilinera apeqqutaatillugu timersornini allanngorartittuarpaa, soorlu ukiukkut sisoraatinik arpanneq, aasakkut assakaasulerluni, qummukajaakkut uteqattaarneq, aasami ukiukkullu qaqqasiorneq, cykelernerlu ingerlataralugit.

Unammersuarnernut peqataasanngikkaluarluni maligassiuisutut inissisimasoqarsinnaasoq naliliisartuniit oqaatigineqarpoq.

Sisimiut illoqarfiani silami timersorluni takussaanerpaat ilagivaat, allaat Sisimiuni silami timersornermi nallernissaqanngitsumik rekordileeqqasoq oqaatigineqarpoq.

Ane ukioqqortusiartoraluarluni eqiasuilluni Arctic Circle Race-mi ukioqatimini sukkanerpaat pingasut akornanni inissisimavoq, aammalu ukioqatigiinni nukarliunerusuni sukkanerpaat pingasut akornanni angusarineqartuniit angusarissaarnerusimalluni.

Ane sisorartartutoqaanngikkaluarluni takutippaa piumassuseqaraanni aamma oqillatsikkiartortoqarsinnaasoq ukioqqortusiartoraluaraanniluunniit.

Sisimiut illoqarfiani peqqinnarnerusumik inuummarinnerusumillu inuuneqalernissatsinnik maligassiuilluartutut nalilerneqarpoq.

Sungiusaasutsialak

Arnatsiaq Rosing, 33-nik ukiulik, ukiuni kingullerni SSP-mi sungiusaasuuvoq pikkorissoq tunniusimasorlu. Piffissamik aaqqissuussilluartarnermigut sapaatip akunneranut sisamariarluni sungiusaaffigisinnaallugit takutippaa, naak marlunnik nukangasunik meeraqaraluarluni.

Sungiusartagai tunniusimallutik angusarissaartarput, 2017-imilu Danmarksmesterskabimi medaljenik arlalinnik Nunatsinnut angerlaassisimallutik. Nunatsinni pissartanngorniunnerni 2017-imi guldit 20-it, sølvit 19-it bronzellu 18-it Sisimiunut angerlaappaat.

Sungiusaanerit ukioq kaajallallugu ingerlattarpai, ukiumi ujakkaarneq aasakkullu rulleski ingerlattarlugit.

Sungiusaaneq akisussaaffeqangaatsiartoq pimoorullugu ingerlattaraa naliliisartut maluginiarsimavaat.

Arlaleriarlunilu Arctic Winter Games-imut peqataasarnikuusimavoq, Arctic Circle Race-milu arlaleriarluni peqataasarnermini angusarissaarnerit akornanniittarsimalluni.

Arnatsiaq Rosing meeraallunili ujakkaarneq aallutilerpaa, sulilu maannamut ingerlallugu.

Timersullammaat 2017. (ass./foto: Johannes Ujo Müller)

 

Timersullammak 2017 Lars Lennert Abelsen. (ass./foto: Johannes Ujo Müller)

 

Piukkunnaatilik 2017 Bjarne A. Andersen. (ass./foto: Johannes Ujo Müller)

 

Maligassiuisoq 2017 Ane Lyberth Olsen. (ass./foto: Johannes Ujo Müller)

 

Sungiusaasutsialak 2017 Arnatsiaq Rosing. (ass./foto: Johannes Ujo Müller)

 

Sisimiuni Tilluuttartut takutitsipput. (ass./foto: Johannes Ujo Müller)

 

Sisimiuni Taekwondortartut takutitsipput. (ass./foto: Johannes Ujo Müller)

 

Timersortarfik inoqarluarpoq. (ass./foto: Johannes Ujo Müller)

 

Timersortarfik inoqarluarpoq. (ass./foto: Johannes Ujo Müller)

 

Erinarsoqatigiit Malik “Nunarput utoqqarsuanngoravit” tusarneqisumik atorpaa. (ass./foto: Johannes Ujo Müller)

 

Pele, Hilda & Lars Frederik appisimaarput. (ass./foto: Johannes Ujo Müller)

 

Siunissami immaqa timersortartussaaraq. (ass./foto: Johannes Ujo Müller)