Savituumi ataqqinaammik nersornaasiineq

Ukiorpassuarni sanaluttartoq 83-inik ukiulik Najaaraq Jeremiassen kunngit pingasuni suleqataasa ataqqinaaammik nersornaaserpaat.

Tamanna Najaaqqap nalusaanik suleqatai pilersaarusiorsimapput januaarillu arfernanni kunngit pingasuni sanaluttarfimmi Savituumi ulloq malunnartinneqarluni.

Pisarnermisut Najaaraq arfininngormat sanaluttarfinnguamini isikkivik saallugu nuersaarujoorpoq, pisarnermisullu aamma poor’loliorsimariarami sanaluttartoqataasa ilaat, Savituumilu siulittaasuusup, Barse Svendsenip issiaqatigiumallugu qaaqquaa.

- Tamassi tikilluaritsi, Kunngit pingasunilu pilluaritsi. Tassaana ukiorpassuarni ilaasortarisimasarput Najaaraq Jeremiassen ningiorput, ilakka isumaqatiginiarsimavakka ataqqinaammik ilaasortaanermut uppernarsaammik tuniumallugu, ukiorpaaluit matuma siornatigut ilaasortanngortinnikuugatigu, Barse Svendsen oqarpoq.  

Arnaq aalajaatsoq

Najaaraq Svendsen ukioq manna 84-iliisussaavoq, sanaluttartooqataasalu nalunngilluaramikku ukiorpassuarnilu sanaluttartuummat Ningiumik taagorpaat. Sanaluttartooqataasa maluginiarsimavaat ukiorpassuarni sanaluttarfimmi aalajaalluni isumagisassat isumagiuarsimagai, pingaartumik igaffimmi tunngasut errugassat errortassalluni eqiasuilluni isumagiuarsimallugit.

- Errugassat errortassat tassa tamaasa isumagisarai, taamaammat ilakka isumaqatiginiarsimavakka tunniusserusullunga ataqqinaamik allagartannguamik upernarsaatissaanik. Neriullungalu inuttannguata ajorissanngikkaa, siulittaasoq oqarpoq nangillunilu.

- Ukiorpassuarni Savituumi ilaasortarput, Ningiorput, Najaaraq Jeremiassen

Qujalluta aalajaallutit ilaasortaajuarninnut, matumuuna ataqqinaammik ilaasortatut allagartamik tunivatsigit. Qujanarujussuaq, neriuppungalu paarilluassagit pilluangaarit.

Najaaraq Jeremiassen 1934-imi Ikerasammi inuuvoq. Anaanaminiit ilinniartinneqarluni assassortalerpoq, 1966-ilu aallartilaartoq uillarnerata kinguninngua sanaluttarfimmiittalersimalluni. Siullermik ujaqqerineq ingerlassimavaa, maannalu nuersaaneq annerusumik aallutarilersimallugu. 

Najaaqqap sanaluttarfiata isikkivia. (ass./foto. Ruth Platou)

 

Sanaluttarfiup siulittaasua Barse Svendsen aamma ataqqinaammik nersornaaserneqartoq Najaaraq Jeremiassen. (ass./foto. Ruth Platou)