Akisussaaqataaneq meeqqallu pingaartillugit

Foto: Johannes Ujo Müller

- Nukappiaqqap tanngassimaarutigaa kinguaariinni siullersaalluni atornerluisuunnginnini. Meeraq qanorluunniit ukioqaraluaruni atugaqarlunilu, meeqqat nipaa inersimasup nipaatulli pingaaruteqarmat nukappiaqqap imigassamik ikiaroornartumillu atornerluinerup kingunerisartagai tujorminartut nammineq atugariumanagit tanngassimaarluni oqariartuutaa nuannersoq inuiaqatigiinnut tusartissallugu pingaartippara, Qeqqata Kommuniani borgmesterip oqalugiaammini aallarniutitut pingaartillugu oqaatigaa.

Oqalugiaammini MIO-p Qeqqata Kommunianut tikeraarsimanera meeqqallu naapinneri nuannaarutigaa. Meeqqallu naapertuunnerusumik ikiorsersinnaajumallugit kommunimi susassaqartut tamaasa peqatigalugit suleqatigiisitanik assigiinngitsunik pilersitsisoqartoq oqaatigalugu.

Sulisinnaasut tamarmik sulissapput

Borgmesterip kommunimut ernumanartoqartippaa inuusuttut suli amerlavallaartut meeqqat atuarfiata kingorna ingerlariaqqittannginnerat.

Maniitsumi inuusuttunik suliniuteqarneq iluatsilluarsimasoq ilaarlugu peqqinnartumillu inuuneqalernissamik ilallugu immikkut Sisimiuni iliuuseqarfiginiarneqalerpoq.

Malik Berthelsenip Qeqqata Kommuniani suliffiit 2018-imi amerlinissaat isumalluarfigai.

Innuttaasut sapiissuseqarlutik suliffeqarfinnik aallartitsisartut pitsaasutut isigisariaqartut nersualaarneqartariaqartullu oqaatigineqarpoq.

- Aningaasarsiullaqqikkuttami ineriartussaagut, aningaasarsiunngikkuttali kinguaritussaagut. Atugarissaassuserpullu annaajartussavarput, borgmesteri erseqqissaavoq.

Isumalluaraluarluni inunnik sullissiviusuni sulisussanik aalajaatsunik amigaateqartuarneq ajornartorsiutitut angisuutut borgmesterip isigaa, taamatullu Kiniserit Filippinerillu maniguullutik Nunatsinni tupinnaannartumik sulilluartut unammillerneqassappata Majoriami inuiaqatigiinnilu annertuumik suliassaqartoq oqaatigalugu. 

- Isumagami malillugu ilaatigut innuttaaasutut akisussaaqataanermik pisussaaffigut puigorlugit pisinnaatitaaffigut kisiisa pingaartippallaartarpagut, Malik Berthelsen isumaqarpoq.  

Aatsitassat, aalisakkat takornariaqarnerlu

Kangerlussuarmi aatsitassanik piiaanissaq kinguaattoorsimasoq aasamut tunisassiulertussanngorpoq, Aatsitassalerinermillu ilinniarfimmi ilinniarsimasut allallu sulilersinnaalissallutik.

Sisimiuni aalisakkerivissamut nutaassamut pilersaaruteqartut aamma Maniitsumi aalisakkerivik nutaamut isumalluarluni borgmesterip oqaatigaa.

Angallannikkut takornariaqarnikkullu Nunatta sinneranit Qeqqata Kommunia katataassanngikkuni kommunitsinni aamma attaveqaatitigut takorniaqarnikkullu kommunini allanisuulli inerisarneqarnissaq pinngitsoorneqarsinnaanngitsoq isumaqarfigaa, nuannaarutigalugulu takornariaqarnikkut ineriartortitsinissamut periarfissagissaarneq eqqarsaatigalugu Sisimiuniit Kangerlussuarmut aqqusinniornissamut misissueqqissaartussanik suleqatigiissitaliortoqarnera Naalakkersuisuniit upperineqarluni tapersersuisoqarnera.

Kangerlussuarmi talittarfeqannginnera pissutigalugu takornarissanik soqutiginnittunik annaasaqartarneq pitsanngorsarneqarnissaa eqqarsaatigalugu Kangerlussuarmi talittarfiliornissaq isumalluarfigaa, Sisimiunimi talittarfittaarnerup kingunerisaanik takornariaqarnikkut pitsaasumik kinguneqarsimanera takussutissaqareersimammat.

Kangerlussuarmi takornariaqarnikkut unnuisarfiuteqarnikkullu inerisaanissamut soqutiginnittut kommunimut saaffiginnittarsimasut oqaatigineqarpoq, naak saaffiginnittut nalunngikkaluaraat Ilulissani Nuummilu mittarfissualiorniartut.

Mittarfeqarfiit Kangerlussuarmi unnuisarfiuteqarnerata inerisaanissaanut kommunimiit naatsorsuutigineqarsinnaanngimmat piaartumik namminersortunngorsarneqarnissaa Qeqqata Kommuniata Naalakkersuisunut piumasarivaa.

Atuakkagut aqerluusagullu tigutigit

Nunatsinni akueqanngitsumik ilinniarsinnaaneq atuuttoq periarfissinneqarsimanerput inuiaqatigiittut tamakkiisumik ilungersuutigineqanngitsoq uggornartippaa. Uffa Nunarsuarmi meeqqat millionilikkaat ilinnialerusullutik ilungersoraluartut.

Meeqqat atuarfianni atuartut ukioqqortusiartornerminni atuanngitsoortarneri inortuisarnerilu qaffasinneri ernumatartippai.

- Misilitsinnermi angusarineqartartut kommuninut allanut sanilliullugit ajornerunngitsumik inissisimanerat naammagisimaaginnassanngilarput. Inuusuttatta ilinniagaqarfinnut qaffasinnerusunut naammattumik piginnaaneqalersimallutik ingerlaqqittassappata, Nunanilu avannarlerni meeqqat atuarfiinut piginnaasatigut nallersuussinnaalissagutta allaqqussinnaangilarput: Atuartutut, angajoqqaatut ilinniartitsisutullu atuarfimmut ataqqinninnerulernissatsinnut ullumikkumiit annertunerujussuarmik immitsinnut piumaffigilernissarput, Malik Berthelsenip oqalugiaammini ilaatigut oqaatigaa.

Sakkortuumik kaammattuutigerusuppaattaaq meerartavut inuiattut atisagut atorlugit angusarissaarsimallutik atuarfimminnik naammassisut amerlisarnissaannut tamatta ilungersoqatigiinnissarput.

Ukiumut qaangiuttumut Qeqqata Kommuniata ingerlanneqarneranut qimoqataasimasut kommunalbestyrelsi sinnerlugu qutsavigivai.

Ukiortaami oqalugiaat tamakkiisoq Qeqqata Kommuniata nittartagaani atuarneqarsinnaavoq.

Ass./Foto: Johannes Ujo Müller