Ukiut 50-it qaangiutereerput

 

Sisimiut arsaattarfiani ivikkat qorsooqqitsillaaraat. Qanga tamanna aamma qorsooqqinnikuuvoq, kisiannili kooqaalulluni pisuffigiuminaalluni marsarluullunilu maniilakulanikuulluni.
Illoqarfiup qeqqani arsaattarfikumi unamminerit qassiit unammereerlutigit, arsarlu GTO-pladsikup tungaanut qasseriarmita aasareerlutigut, massakkut arsaattarfiusoq 1968-imi aggustimi atulerpoq.
Taamanikkut GTO-p inissiaqarfiani inuusuttorpassuuvugut. Taamani sissamut aqqusineq, aalisartut talittarfiat, imarpikkoortaatit talittarfiat, quersuaq il.il. sanaartorpagut.
Taamani ulluinnarni ullaakkut arfinernut suliartoraangatta unnukkut qulingiluanut soraartaratta sunngiffimmi sammisassanut piffissaqarpianngikkaluarluta, illoqarfimmi inuusuttullu misilillugu arsaattarfiliorniarluta isumaqatigiippugut. Massakkut Sisimiuni arsaattarfiup pilersinneqarnera taamak aallartippoq.
Taamani Topsøe Jensen-ip bulldozer-iinik aputaajaataanillu unnukkut sapaatip akunnerisalu naanerini atorniartarpugut. Taakku atorlugit sapinngisatsinnik nuna manissisorujussuuarput, anginngikkaluarmillu tassuugu atulertumik assammik arsaattarfimmik pilersitsilluta. Kingorna arsaattarfik arlaleriarluni allanngortinneqarlunilu allilerneqartarpoq.
Taamani S68 aamma pilersinneqannguatsiarpoq, tamannali eqqaamaqqissaanngilara.
Taamani aamma Palasip qaqqaata ataatungaani massakkut mittarfiusumi nunatarujussuarmut unammiartorluta umiatsiamik angallanneqartarnikuuvugut.
Maannakkut ukiut 50-erluinnaat qaangiuttullu arsaattarfik kingumut qorsooqqitsippoq. Ila kusatsinnerami, atorluarisiuk.
Sisimiut, innuttaasut, minnerunngitsumillu inuusuttut timersortartut timersuutiminnik aallussinissaminnut periarfissagissaalersut pilluaritsi. Arsaattarfittaarsi ukiorpassuarni piusussanngorlugu paarilluarisiuk.
Pilluaritsi.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl