Sooq meeqqeriveqarneq taama kipparitsigissava?

 

Ullutsinni ”inuuvugut” meeraq qitiutillugu.
Meeqqanik qitiutitsineq allaffissornikkut sulisunik pingaartinneqannginnerpoq imaluunniit tassani issiasut allannguisinnaanermut nukissaqannginnerput piumassuseqannginnerpulluunniit?

Kommunerput meeqqeriveqarnikkut suliniuteqarluarnikuunera mikisuuteqarluni qujanarunartorujussuuvoq. Aanali uparuarusutara.
Qatanngutigiit meeqqerivinnut assigiinngitsunut inissinneqarsimatillugit meeqqat annerpaamik eqqorneqartarput. Angajoqqaat tamarmik suliffillit meeqqap aappaa ullaakkut tunniutiaartariaqarpaat ualikkullu kingusinnerusukkut aasariaqarlugu piffiit assigiinngitsut orninnissaat pissutigalugu.
Oqarutta meeqqat nal. 19:00 innartartut. Ualikkut tallimanut angerlarunik angajoqqaat nerisassiussapput. Arfinernut nerigunik tamatuma kingorna meeqqat uffarunik innassapput.
Ullormut meeqqat angajoqqaallu qassi minut-iinnarluunniit ilagiinnerulaarsinnaanerat ilaqutariinnut minnerunngitsumik meeqqanut isumalerujussuuvoq.
Angajoqqaat ilungersorlutik meeqqerivilerisunut saaffiginnikkaangamik makkunannga oqarfigineqartarsimapput:
”Qujaniarit meeqqerivinni inissaqarmata”
”Meeqqerivimmut utaqqisueruppat nuussinnaavoq”
”Ukiummi taakkuinnaat taamatut inissisimassaaq”
Ilumut qujanarneqanngilaq meeqqerivimmi inissaqarmata.
Meeqqerivinnut utaqqisuerunnavianngilaq
Ukiumut ullorpassuupput…..

Oqartoqassanngilaq kikkut tamarmik assigiimmik pineqartut. Nalunngisaqarpunga ajornaquteqanngitsumik qatanngutigiinnik ataatsimoortinneqartunik (nuutsinneqarnikkut). Ilaanullu ajornavippoq.
Meeqqeriviinni inissaqalersillugu ikioqqullutik saaffiginnittut qiviarneqarsinnaannginneramik?
Aamma ilisimaneqarpoq illoqarfitta iluani meeqqerivinni sullissineq assigiinngitsorujussuummata. Angajoqqaajulluni uummatinngulaarnartassaqaaq meeraq iluunngarluni aliasuttoq ullaat tamangajalluinnaasa misigisarlugu. Qanorli meeqqamut ajorlunilu ulloq takisartigaa, tassalu angajoqqaat sulisariaqarlutit.
Meeqqeriviit ilai pisariaqarluinnarpasipput sukumiisumik nakkutigineqarnissai.
Taakkartuutissaqarnaraluaqaaq inunnulli ataasiakkaanut attuumasinnaammata ugguuna tamakku eqqaaneqanngillat.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl