Jan Olsen-imut akissut

Asasara Jan Olsen

Sivdlek' nr. 22-mi atuartartutut allakkannut qujanaq, taanna Qeqqata Kommunia sinnerlugu akissavara.

Atuartartutut allakkat politikkikkut eqqarsaatersuutinik aamma imaqarmata, akissuteqaatinni allaffissornermi tunngasunut samminnissaanga. Kommunip pilersaarusiorneqarnerani tapiliussaq nr. 21 "Sisimiuni Kangerluarsunnguami Inuussutissarsiuuteqarfik" 2018-imi juunip 15-iani kommunalbestyrelsimit akuersissutigineqarpoq. Kommunip pilersaarusiorfigineqarnerani tapiliussap akuersissugineqannginnerani marsip 15-ianiit maajip qulingata tungaanut tamanut tusarniutigineqarpoq. Tassani innuttaasut peqatigiiffiilluunniit akerliliissutinik oqaaseqaatinilluunniit takkussaqarnissamut periarfissaqarnikuupput. Kommunip pilersaarusiorfigineqarnerani tapiliussaq akuersissutigereernerata kingorna, 2017-imi oktobarip 26-ani kommunalbestyrelsi aalajangerpoq, heliportitoqqap eqqaani nunaminertaq sanaartorfigissarneqassasoq.

Aalajangiineq taanna piviusunngortinniarlugu maanna Teknikkeqarnermut Avatangiisinullu immikkoortortaq suliaqarpoq. Suliniummut akitsorsaataasinnaasunik kinguaattoornissanik pinngitsuuiniarsarivugut.

Atuartartutut allakkiami ilaatigut piffissap ingerlanerani qimmilivinnik uteqattaartumik nuutsisarneq, maannakkut nuutsisoqarnissaanik peqqusineq, kommunip pilersaarusiorfigineqarnerani qimminik ukkataqannginneq kiisalu Namminersorlutik Oqartussanut naammagittaalliuut suli akineqanngitoq naammagittaalliuutigineqarpoq. Naammagittaalliuut pillugu assilineranik nassinneqarluta paasissutissinneqarpugut.

Illuatungaatigut Qimmeqarfik-mi qimmiutillit ikiorniarlugit annertusaanikuuvugut. Kommunip pilersaarusiorneqarnera eqqarsaatigalugu ataatsimut isigalugu qimmilivinnut nunaminertanik atugassiissutinik piffissanik killilikkanik tamaallaat tunniussisarpugut, taamaaliunngikkuttaa aamma kommunip sanaartorfigissaanermut aningaasartuutaanut qimmiutillit akiliuteqassammata. Nunaminertanik sanaartorfigssaanissamut pisariaqartitsisoqalernissaata tungaanut aammalu kommunip pilersaarusiorfigineqarnerani tapiliussami siunertarineqartumut atorneqalernissaata tungaanut, nunaminertat utaqqiisaasumik qimmiutilinnit atorneqartarput. Taamaammat sanaartortoqassappat qimmiutit nuunneqartussapput. Qimmiutillit aamma imermik pajunneqarlutik containerinillu eqqaavinnik akeqanngitsumik sullinneqarput. Taanna kommunip qimmiutilinnut immikkuullarissumik sullissinertut tunniussarimmagu naqissuserusuppara, sunngiffimmi sammisaqarnermut peqatigiiffinnullu allanut atorneqanngitsoq.

Taassuma saniatigut Qeqqata Kommunia qimussertartut peqatigiiffiannik Qimussip siulersuisuini aallartitaanik ataatsimeeqateqarnikuuvoq, tassani borgmesteri aamma Teknikkeqarnermut Avatangiisinut Aatsitassarsiornermullu ataatsimiititaliami siulittaasoq peqataanikuullutik. Suliaq pineqartoq aammalu qimmiutilinnut pissutsit ataatsimut isigalugit pitsaasumik oqaloqatigiittoqarpoq, kiisalu malitsigisaanik Qimussip tungaaniit ataatsimiinnermi amerlanerusunik peqataaffiusumik ataatsimiittoqartarnissaa isumaqatigiissutigineqarpoq.

Maanna ukiuunera kikkunnut tamanut qinngasaarinikuuvoq, aammalu kingullertigut nuutsinissamut, aammalu anginerusunik nuutsinissamut maskinanik, kiisalu qimmit kalunnerinik pituttuinissamut betoninik akeqanngitsunik ikiuunnissamut kommuni neqerooruteqarnikuuvoq. Sinnera qimmiutillit nammineq akilertariaqarpaat.

Taamaattumik isumaqarpunga, qimmiutillit pisariaqartitaannik kissaataannillu sapinngisaq tamaat isigalugu kommuni isiginninniarnikuusoq. Kommunip pilersaarusiorneqarnera Teknikkimut Avatangiisinullu immikkoortortap ingerlatarinngilaa, kisianni qularinngilluinnarpara, qimmiutilinnut atugassarititaasut ataatsimut isigalugu siumut isiginnittumik ukkataqarnermik suliaqarneq ingerlateqqinneqassasoq.

Inussiarnersumik Inuulluaqqusillunga

Hans Ulrik Skifte
Teknikkimut Avatangiisinullu pisortaq


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl