Qimussit aqqutaat aanngariartorput

Allattoq Jan Olsen, Sisimiut

 

Kalaallit Nunaanni qimmit qimuttut, qimussertartullu ukiut ingerlanerini annertuumik ikileriarsimapput. Ikileriarnerat malunnangaarmat qimmit qimuttut, qimuttunillu qimmiuteqarnermik Kalaallit Nunaanni kulturi immikkuullarissoq, ukiut arlaqanngitsut qaangiuppata tammakaratarsinnaapput.

Sisimiut kusanarluinnartumik avatangiiseqartoq piukkunnarluinnarpoq, kinguaariippassuarnillu qimusserfigineqartarsimalluni. Kalaallit Nunaata avannaani sikumi qimussertartut assigalugit Sisimiut eqqaani sikumi qimusserneq ajoratta, naak, silaannaq kissatsikkiartoraluartoq Sisimiut eqqaani suli qimussersinnaasarpugut. Ukiut qulikkaat kingulliit ingerlanerini takornarissat Kalaallit Nunaata kusanarnerpaaffiani (qimussini tuttup amianik allequtserlutik qimminut qimukkusoqisunut, pinngortitarsuarmullu immikkuullarissumut isikkiveqarlutik) misigisaqarnissaminnut aamma periarfissaqarsimapput, malitsigisaanillu misigisimasatik assinngorlugit ingerlateqqittarlugit. Taamaalilluni Kalaallit Nunaata ussassaarutigineqartarnerpassuini, qimussit pingaarnertut takoqqusaarutigineqartarput.

Qimmit qimuttut ikileriarnerat patsisaalluni isumasioqatigiinnerit annertuut assigiinngitsut aaqqissuunneqarnikuupput, qimussertarnermik kulturitsinnik uagut illersuinissatta, kinguaassattalu illersuinissaasa pingaaruteqassusia politikerit erseqqissaatiginikuuaat, ilaatigullu qimmit qimuttut pigiinnarneqarnissaannut ilisimatusarnissamut millionilikkaanik aningaasaliisoqarnikuulluni. DNA-mik misissueqqissaarnerit nutaat uppernarsarpaat, Kalaallit Nunaanni qimmit qimuttut immikkuullarilluinnartuullutik ”minguinnerpaamik akuneqanngitsumillu” amaqqunit kingoqqisuusut. Qimussertartorpassuusugut suliniutinik taakkunannga qujarussivugut.

Taamaakkaluartoq tunngaviatigut Qeqqata Kommunia kukkorujussuarnialerpoq. Ukiut ingerlanerini qimmit illoqarfimmit nuunneqarnissaat politikkerineqarpoq, tamatumalu kingunerisaanik Qimmeqarfik pilersinneqarluni. Innuttaasut ilaatigut tipimiujunnaarlutillu qimminit qiluttunit akornusersorneqarunnaartussaammata, qimmit nussorneqarnerat ilaatigut isumatusaarnerusinnaavoq. Qimmit nuunneqarnerat qimmiutilinnut ataasiakkaanut suliassaq annertullunilu akisoorujussuuvoq. Qimmit illersorneqarsinnaasumik panertumilu inissisimanissaannut pituffissat qaarsunut ikkussorneqartussaapput, qimmiutillillu arlallit qimmit inaannik, toqqavinnilu quinik qimussernermi atortunut qimmillu nerisassaannut atugassaminnik sanaartornikuullutik.

Piffissap ingerlanerani innuttaasut biilillit, aningaasatigullu inissisimalluartut kisimik qimmeqarsinnaalernerat pingaarnertut aamma ajornartorsiutaavoq. Qimussertarnerup siunissami attatiinnarneqarnissaanut meeqqat inuusuttullu amigaatigaagut; qimmit illoqarfimmit ungasilliartortinnerisigut, qimussertarnermik ilinniarnissaminnut, qimminillu akisussaassusilimmik ulluinnarni nakkutiginninnissamik misigisaqarnissamut inuusuttut periarfissinneqartartut ikiliartuinnassapput.
”Qimmeqarfimmut” Qeqqata Kommuniata pilersaarutini attatiinnarsinnaasimanngilaa. Taamaalilluni qimmiutilippassuusugut ataasiaannarata qimmilivigut nuuttariaqarsimavagut. Qimmiutillit ataasiakkaat pingasoriarlutik qimmilivitik nuuttariaqarsimavaat!

12. februar 2018-imi qimmiutilippassuit (aasiit) qimmilivimminnik illoqarfimmut (suli) ungasinnerusumut nuutsinissaminnut piumaffigineqarput. Qimmiliviit sanilereeqqissaarlutik, qanillutik (kukkukuutut inikilliortitaasutut), amerlanertigullu pituffissaliorfigineqarsinnaanatik qaarsoqanngitsumi inissinneqassasut takorloorneqarpoq.
Nuutsinissamik peqqusisoqarnera patsisaalluni, qimmiutillit eqqugaasut tamarmik atsiukkaminnik naammagittaaliuuteqarput. Qimmiliviit naleqqutinngitsumik nuunneqartuarnerat qimmiutillit eqqartorpaat, kommunillu peqqusinera allanngortinneqarsinnaanngippat qimmiliviit nuunneqarnissaannut kommuni ikiuussinnaanersoq aperalugu. Naammagittaalliuut Qeqqata Kommunianut Namminersorlutik Oqartussanullu nassiunneqarpoq, akineqarnikuunngisaannarlunili.

Qimmiliviit kingusinnerpaamik ataasinngornermi maajip 28-ani nooreersimanissaannik piumasaqaatitaqarlutik allakkat, tallimanngornermi maajip 25-ani qimmiutillit allakkanik aatsisartumit tiguaat.

Qimmiutillit ilaat qimmilivimminnik nuutseqqinnissartik nukissaqarfiginagu, qimmiutitik toqutsiinnarniarpaat.
Kingumut isumatusaaqqilernissaq, qimmiliviillu nuutsinneqaqqinnissaannut Qeqqata Kommuniani aalajangiisimanerup tunuartinneqarnissaannik neriuuteqartut arlalippassuuvugut.
Aalajangiineq attatiinnarneqassappat, qimmit qimuttut pigiinnarneqarnissaat, qimussertarnerullu attatiinnarneqarnissaa; naak, ilisimatusarnerit akisuut, isumasioqatigiinnerit, oqalugiaatillu isumalluarnaqisut ingerlanneqarsimagaluartut, politikkikkut pingaartinneqannginnerinut allanngortitassaanngitsumik uppernarsaataavoq. Aallaqqaasiullugu eqqaaneqareersutut, qimmit qimuttut, qimuttunillu qimmiuteqarnermik kulturi naatsorsuutigisamit siusinnerujussuarmik tammakaratarsinnaanerat piviusorsiorpalaarpoq. Taamani Kalaallit Nunaanni immikkuullarilluinnartumik imminnut ilinniartinneqartarnerat, nuannisaqatigiittarnerat, nunarsuarmioqatinullu takutitsisarnerat pillugu, kinguaassagut katersugaasivimmut Youtube-milu isiginnaagassianut innersuunneqartalissapput.

 


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl