KNB-mi siulersuisuunernut qisuariaat

Akaaraq Samuel Olsen, Kalaallit Nunaani Brugsenimi ilaasortaq

 

Qisuariaatinnut siullermut akissutinnut qujavunga taassumali isummakkut nalujunnaarsinngilaanga. Isumaqartuarpunga Kalaallit Nunaanni Brugseni peqatigiiffittut tunngavigisamigut, tassa demokratimik - ilaasortat oqartussaaqataanerannik - tunngaveqqarluni ingerlatsisuunera innarlerneqartoq.

  1. Tassami Inatsisartut aalakoornartoq pillugu Inatsisaannik 1. marts 2018-imi atuutilersitsinikkut Kalaallit Nunaanni Brugsenimi ilaasortarpassuit 18-inik ukioqalereersimasut 25-nik ukioqalersimanngikkunik najukkami siulersuisunut siulersuisuunernullu qinigaasinnaajunnaarput.

  2. Qinersisinnaatitaanermut qinigaasinnaatitaanermullu Danmarkip naalagaaffiani Inatsisini Tunngaviusumi aalajangersagaavoq Kalallit Nunaanni tamakku pillugit aalajangersakkat malinneqassasut.

  3. Qinigaasinnaatitaaneq qinersisinnaatitaanerlu pillugit inatsimmi Kalaallit Nunaanni piumasaavoq 18-inik ukioqalersimanissaq.

  4. Aalakoornartoq pillugu inatsisip pisinnaatitaaffiit taakku atorunnaarsissinnaanngilai sakkukillisarsinnaanagilluunniit. Aalakoornartormi pillugu inatsit innuttaasut pisinnaatitaaffiinik piiaasinnaanngilaq.

Neriuppunga tusarniaavigineqarassi tamakku eqqumaffigisimassagisi akissuteqaatigalugillu.

Ilanngullugu iluatsillugu uparualaassavara Kalaallit Nunaanni Brugsenip malittarisassaani §16 amigaateqarmat tusarniaanermut tunngasortaa allassimanani.

Neriuppunga uparuakkakka eqqumaniarfigilaarumaarisi malittarisassallu naqqiuteqarfigalugit.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl 

Blogs kingulliit