Mittarfiliorniarnerneq silaannakkullu angallanneq

All. Villy Olsvig, Inuit Ataqatigiit, +299 53 34 14

 

Mittarfiliorniarnermi aammalu silaannakkut aaqqissuussiniarnermi aningaasatigut angallannikkullu kingunissai qulakkeerluarneqartariaqarput


Nunatsinni silaannakkut angallannermik annertuumik aaqqissuusseqqinniarnermi isumakulunnarsinnaasut aallaavigalugit qisuariaat.
Tamatta nalujunnaarsimalereerparput Kalaallit Airport A/S pilersinneqarnerani siunnerfiup qiteringaa Nuuk,- Ilulissat nunat tamalaat mittarfeqarfissaannik minnerpaamik 2200 miiterinik, taamatuttaarlu Qaqortoq-p atlantikup avannaa ikaarlugu mittarfiusinnaasumik minnerpaamik 1499 miiterimik sanasoqarnissaa.
Taakkulu sananeqarumaarnissaasa kingunerisaanik illoqarfiit arlalissuit annikinnerusumik annertunerusumilluunniit eqqugaanissaat aamma ilimagineqarluinnartariaqartoq, tassanilu illoqarfiit maannamut mittarfeqareersut pineqarput Sisimiut,- Maniitsoq,- Aasiaat,- Qaarsut,- Upernavik,- Qaanaaq aammalu Paamiut mittaarfii annikillileriffigineqarnissaat ilaatigut aamma oqaatigineqarmat, allaat timmisartut mikinerusut ilaasukinnerusut aammalu usinik nassataqarsinnaanermikkut killeqarnerusut atorneqalersinnaallutik.
Sisimiut tassaavoq illoqarfigaattiarujussuaq taassumallumi kingunerisaanik silaannakkut angallannermi timmisartukkut inunnik assartuussinermi annertuumik atorneqartartoq.
Taamatuttaarlu illoqarfik tassaavoq annertuumik kilisaatit pisaminnik usigiaasarfiat taassumallumi kingunerisaanik kingoraartissaasinnaasunik initulaarsinnaasunik ilaatigullu oqimaassinnaasartunik aallaaviulluartartoq, taamatuttaarlu aamma ippoq kilisaammi inuttat paarlaanneqarneranni tikinneqartartoq.

 

Timmisartut angissusaat

Silaannakkut assartuutit Dash 7-nit atorunnaarlugit Dash 8-nut ikaarsaartoqarnerani annertuumik tassaniinnarluunniit Sisimiut-nut kingunerluttoqarnikuuvoq, taamaattumillu suli manna pilersaarutaasut kinguneriumaagassai assut ernumanarlutillu isumakulunnarput.
Sisimiut aammalu Aasiaat tassaapput ilinniartoqarfiit, ilinniartorpassuit tikerarlutillu aamma aallararsinnaasarput, takkulu timmisartumik 19-niinnarnik ilaasoqarsinnaasumik kiffartuunneqar-sinnaaneranik takorluuineq isumatusaarnerunngilaq.

 

Kangerlussuaq Narsarsuarlu

Minnerunngitsumillu aamma eqqaaneqartariaqarpoq Kalaallit Airport A/S-ip mittarfiliornissamik pilersaarutaasa piviusunngorneratigut annertuumik Kangerlussuaq-mut taamatuttaarlu Narsarsuaq-mut sunniuteqassammata, uangalu nammineq naliliissaguma nunaqarfiit uummatai tassani eqqorneqassapput, tamaalillunilu nunaqarfiit ukiut arlaqanngitsut qaagiunnerani innuttaasoqarnermikkut annertuumik sunnersimaneqassapput, taamaalisoqalissappallu nunatta karsia annertuumik nunaqarfiup inukillisimasinnaajumaaqisup salinneqarneranut isaterinernut annertuumik pilliuteqartussaassaaq.
Kangerlussuaq taamatuttaarlu mittarfiit pioreersut annikillileriffigineqarnissaat Sisimiut-ni aammalu Maniitsoq-mi eqqarsaatigiinnassagaanni ilimanarluinnarpoq tamanna Qeqqata Kommuniata aningaasaqarniarneranut annertuumik sunniuteqassaqaaq.
Inuiaqatigiit aaqqissuussaanitsinni inoqarfinniit isorliunerusuniit nunaqarfinnillu eqiterukkiartuaarneq suli soorlulusooq siunissami annertunerulluarsinnaalluartoq, tassami illoqarfippassuit siunissami silaannakkut kiffartuunneqarneri annertuumik sunniuteqassaqaaq, tamannalu imaaliallaannaq peqataaffigineqarsinnaasorinanngilluinnarpoq.

 

Qulaajagassaqarpugut

Nunatta sineriani illoqarfiit sinneri Qasigiannguit,- Kangaatsiaq,- Qeqertarsuaq,- Narsaq,- Nanortalik taamatuttaarlu Ittoqqortoormiut sioqqanik ujaraaqqanillu Tasiilaq-lu 1499 miiterimik mittarfittaarsinnaaneri ajunngilluinnarmata, taamaattorli piffinni illoqarfinni taakkunani qaquguugaluarnersoq mittarfittaarsinnaanerit nalulluinnarallarpagut, tassami maannamut takuneqarsinnaasoq ataasiinnaavoq misissueqqissaarsinnaanermut taamaallaat aningaasanik illikartitsisoqarpoq.
Piffiit illoqarfiit qulaani taaneqartut arlaqarput annertuumik inunnik assartuussinikkut imaatigut aammalumi silaannakkut ukiuni kingullerni nalaataqarnerlussimasut, taamaattumillu maanna qaquguugaluarnersumut isumalluartiinnarneqannginnissaat aallaaviliullugu ersarissumik sanaartorsinnaanernik ukiulersuisoqarsinnaanissaa kissaatiginarluinnarpoq.

 

Mittarfiliornerup kingunissai

Nunatsinni mittarfinnik sanaartornerup kinguneranik makku uanga ilaatigut apeqquserusuppakka: Angallannikkut aaqqissugaanerup unammilleqatigiiffiunerulernaviarunanngilaq,- Angallassinermi aningaasartuutinik ikilisaasoqarnavianngilaq aamma innuttaasunut,- Piffiit ilaanni inuussutissarsiornermut aamma takornariaqarnikkut ineriartortitsinermut iluaqutaanissaa apeqqusertariaqarsorinarpoq illoqarfinnut mittarfeqarfioreersunut annikinnerusumik pisinnaatitaaffilierneqartunut,- Angallannikkut billetit akikinnerulernissaat aamma qularnarpoq,- Maannamut angallassinermi aningaasartuutaasartut annikillinissaat takujuminaatsippara, aamma ilumut inuit angalasinnaanerannut suli ajornakusoornerulissagatinnarpoq,- Nunatsinni pisortat suliassaqarfiinut sipaarnerulersitsissasoq apeqqusernarpoq,- Nunatsinni kiffartuussinikkut angallassinermi tapiissuteqartarnermi sipaaruteqartoqarnissaa assorsuaq tunngavilersullaqunarpoq, kiisalu nunatsinni pisortat angallanneranni akit appasinnerulernissaat upperiuminaatsippara.

 

Inuit akiligaannik

Silaannakkummi aaqqissuussiniarnermi naggataani akiliisussaq ataasinnaavoq tassalu nunami maani inuttaaqataallunilu akileraaqataasoq.
Silaannakkut aaqqissuussinermi inoqarfinniinnaq pineqanngilaq, tassami aamma silaannakkut angallassissutaasut aamma annertuumik allanngorsinnaalluarput, Nuuk siunissami Norsaq-tut ittumik kiffartuunneqassajunnarsivoq, taannali manna pisoqalisimasoq taarserneqarnissaa qalligunarpoq, Ilulissat aammalu Qaqortoq tamarmik immikkut assigiinngitsunik timmisartumik tikinneqartalerumaassajunnarsipput,- sinerissallu sinnera timmisartunik 19-ninik ilaasoqar-sinnaasunik kiffartuunniarneqarpasipput, sulili Bell 212 atorneqarallartuarnissaa aamma takorloorsinnaalluarparput.

 


Qisuariarnerma tunngavia

Inatsisartut-mi ukiut marlussuit matuma siorna aaliangersaaffiat imatut qulequtaqartinneqarpoq: "Nunatsinni assartuussinermi ataatsimut aningaasartuutit annikillisinnissaat aamma timmisartuussisarnerup akulikillinissaa siunertaralugit, nunap immikkoortuini silaannakkut angallannermut attaveqaatit ataatsimoortut silaannakkut angallassinermut pilersaarummut ilanngunneqarnissaannik qinigaaffimmi matumani Naalakkersuisut saqqummiussinissamut peqquneqarnissaannut Inatsisartut aalajangiiffigisassaattut siunnersuut. Taamaalilluni suliassaqarfimmi immikkoortumut pilersaarummi mittarfiit aamma qulimiguullit mittarfiisa akunnittarfiisalu pioreersut piginnaasaasa millineqarnissaat allineqarnissaallu nunap immikkoortuini tulleriiaarinermut ilanngunneqassapput."

 

Naggasiissut

Taamaammat angallannikkut apeqqutit assigiinngitsut qulakkeeqqaagassat amerlapput, inunnut tamanut akiligassanngunnginnissaa, angalaniarnermullu akit qaffarujussuarnissaat pinngitsoortinniassagutsigu.
Naggataatigut kissaatigiinnarsinnaavara naalakkersuisut sineriammi innuttaaqatigut silaannakkut angallannermik takorluukkersaarutit pilersaarutit sukumiisumik paasititsiniutigissagaat.

 


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl 

Blogs kingulliit