Qinersilerpugut

All. Hermann Berthelsen, Siumut

 

Uannik ilisimannittut nalunngilluinnarpaat marlunnik qinigaaffeqartarneq akerleriuaannarsimagiga.
Ukiullu amerlasuut kommunalbestyrelsimi borgmesteritullu sulisimaninni Inatsisartunut qinigassanngortinnissannut tunuarsimaartarsimavunga.

Massakkullu periarfissatut isigaara kiisami Inatsisartunut qineqqusaarnissamut sassarnissannut.
Sassarnissannut tunngavilersuutima ilai qilanaartuutitut saqqummiutilaarusuppakka.

Ilisimaneqartutut qinigaaffik kingulleq Siumut Sisimiut ajoraluartumik qinigaatitaqanngitsoorpoq.
Tamanna aamma Inatsisartuni sulinermi amigaataasoq takuneqarsinnaavoq.

Taamaattumik kajumissaarutigissavara Sisimiormiut eqqaamiugullu nunaqqatiminnik taasinissartik annertuumik eqqarsaatigissagaat atorluarlugulu. Sisimiuneersut Siumukkormiut nipaat amigaa-tigaarput. Partiinut allanut qinersisussat aamma taamaalioraluarunik iluaqutaaginnassaaq.

Mittarfiit pingasut 3,6 mia. kruuninik (qafferiapiloorsinnaapput ) akeqartussat sananiarneqarnerata qanoq aningaasalersorneqarnissaat maannamut suli paasinngilara, taamaattumillu paasitinnagu isumaqataasinnaanngilanga.
Ilaatigunngooq TELE-p aningaasaataanit aallarniuserneqassapput. Uanga isumaga malillugu TELE-p sinneqartoorutai tamatsinnut akikillisaatitut atorneqassagaluarput.
Taamaaliorneq aningaasanik nutaanik pilersitsinngilaq. Akileraarutinilli qaffaanertut
isigisariaqarluni.

Eqqaamatigu aningaasat annikinnerujussuit pigerikkagut atorlugit takornariat nutaat amerlasuut tikisinneqarsinnaalissapput Sisimiuniit Kangerlussuarmut aqqusiniliornikkut. Sermersuaq milliga-lutttuinnartoq takorusunneqartoq takuniarneqarluassaaq aammalu aqqusinersuassaq atorlugu nuna ornigarluarneqassaaq inuussutissarsiutinillu nutaanik pilersitsilluni. Takornariartitsineq inuussutissarsiornerillu nutaat aningaasanik nutaanik pilersitsisussat.

Nunatsinnimi iluarsisassagut suli amerlaqaat minnerunngitsumik meeqqanut, ilinniartitaanernut,
utoqqarnut allarpassuarnullu. Puigornagulu inissaaleqisut sullinneqarnerulertariaqarmata.
Mittarfissuarnut atornagit ilaatigut qulaani taasannut atortigit inuussutissarsiortullu tapersersornerulernissaannut, minnerunngitsumillu aalisartut sineriassortut aningaasatigut ajornannginnerusumik attartorfigisinnaasaannik, soorlu Inuussutissarsiutitigut Tapiisarfimmik annertunerusumik pilersitsinikkut. Taava suliffiit nutaat naleqartitsinerulertussallu pilersinneqassapput. Ukiorpassuarnilu akilersugassanik nunarput akiitsunitsinneqarani.

Qineqqusaarnermi allarpassuarnik saqqumiisarnissannut qilanaarpunga. Neriuppunga qineqqusaarneq pissuserissaartumik tunngavilersorluakkamillu ingerlanneqarumaartoq.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl