Arnamik nersorinninneq

All. Kirsten Lyberth

 

Sivdlek´nr. 7 – 14.februar 2018 agguaanneqartoq aallaavigalugu Arnat Ulluannut saatillugu nammineq eqqaamasat isummersuutigisartakkallu tunngavigalugit qimarnguik Oqqiffimmi arnat sulisimasut matumuuna nersorusuppakka.

Atuagassiap saqqaani allassimavoq ”Sisimiormiutoqqat anersaavat eqqaallugu” qupperneq 7 – milu Akaaraq Samuel Olsenip ilanngussaa qulequtserneqarsimavoq ”Peqatigiiffilerineq soqutigineerukkiartorpa?”

Sisimiormiutoqqat eqeersimaartuunerarneqartarput. Oqaluttuarisaanermi misinnarsinnaasarpoq angutit oqaluttuarineqarnerusartut. Oqariartaaseq una ilanngukkusuppata:”There´s a woman behind the man” – angutip tunuaniippoq arnaq. Takussutissaasarmammi arnaq angullu tasioqatigiikkaangata inerititaq kusanarnerusartoq.

Anguterpassuit peqatigiiffilerinermi peqatigiiffeqarnerup anersaava tunngavigalugu sulilluartorpassuit aamma nersorusuppakka.

Oqqiffiup oqaluttuartassaa qitiutinnagu arnarpassuit tunniusimaqqissaarlutik sulisimasut Arnat Ulluan-nut atatillugu nersorusuppakka. Qulaani taasattut eqqaamasat tunngaviupput, allat oqaluttuassartaa eqqaamanerussavaat.

Qimarnguik Oqqiffik arnarpassuit ilaanni initusimavoq. Nammineq kaujumissutsimik, tunniusimanermik, akisussaassusermik pilliuteqarnermillu Sisimiormiunut malunniuteqarsimavoq.

Eqqaamasat malillugit aallarniisunut ilaapput Medea Rohman Hansen, Âníse S. Johansen, Cecilie Karla Olsen, Eva Johansen aamma Liisi Egede Hegelund.

Qimarnguik Mannarsip Aqquserngani inissisimavoq, illunnguarlu suli napavoq. Taamanikkut aningaasat atugassat killeqarmata arnarpassuit namminneq angerlarsimaffimminnit illu pilersorpaat; pisattat, oqorutit, oqorutit qalii, atisat, iggaffimmi atortut, saagut, pinngussat il.il. Taamani mobileqanngimmat aappannit suliffinnut qaqutigoortumik sianerfigineqarpunga. Angerlarami nalaasaarfik kingorarsimavaa, akivara Oqqiffimmukaassimallugu.

1980 - ikkunni arnarpassuit Oqqiffik ingerlalluartinniarlugu ulapputtarsimaqaat sapaatillu akunnerisa naanirini vagtiusarlutik. Amerlanerit suliffeqarput mikisunillu qitornaqartiterlutik. Vagtiunerup nalaani aappaasut takkuttarput qitornatik arnaannut milutsikkiartorlugit angerlaateqqillugillu, ilaatigut aamma unnukkut kingusissukkut. Vagtiunermi unnukkumiit ullaamut pisinnaasarmat. Sap.ak.naanerani akunnerit 24 – it paarlakaajaaffiullutik.

Illup aqunneqarnerata vagtiusarnerillu saniatigut ataatsimiinnerit, pilersaarusiornerit ataqatigiissaarinerillu pisarput. Naammagittaalliornerit piffissamillu aporfissarsiortut ullumikkutut initunngillat. Pinartoqartillugu angerlarsimaffik qimallugu suliartupallannerit pisinnaasarput.

Anersaaq ersarissoq ataqqillugu kivitseqatigiinneq malunnaatilik kingumut eqqaaneqartuartarpoq. Nammineq kajumissutsimik suliaqartut aappaminnit, qitornaminnit ilaquttaminnillu annertuumik tapersersorneqartarnerat suli eqqaamaneqartarpoq. Assersuutitut taalara peqquteqavissumik nammineq kajumissutsiminik sulisoq pisinnaajunnaariataarpat aappaasoq, anaanaq, qatanngut ikinngulluunniit taarseeriataarsinnaasarpoq, taamaalilluni nammineq kajumissutsimik sulineq ikioqatigiinnerlu ersarissumik siammartarluni.

Nammineq kajummissutsimik suliaqarneq allanngornikooqaaq, tupinnanngitsumillu uparuarneqarpoq.

Oqqiffimmut tunngatillugu aalajaallutik sulisimasorpassuit uaniitippakka. Immikkut taarusuppakka Laura Olsen aapparigalualu Pele Thomassen kiisalu Ane Johanne Olsen. Aamma annertuumik qutsavissaapput namminneq kajumissutsiminnik sulisimasut aappaat ilaqutaallu.

Uanga nammineq Arnat Ulluanni qutsavissakka ornissavakka – taakkorpiaat tapersersuisimanngippata nammineq kajumissutsinnik assigiinngitsutigut suleqataasimanaviannginnama. Minnerunngitsumik angajoqqaakka peqatigiiffilerinermi uannut maligassiuisuusimammata.

Pinngitsoorusunngilangalu arnarpassuit peqatigiiffeqarnerup anersaavanik ingerlatsinikut ingerlatitseqqinnikuusullu nersussallugit; Arnat Peqatigiinni, meeqqat Danmarkimut atuariartortinneqartarallarmata katersuiniarnernilu suleqataasimasut, spejdereqarnermi, timersoqatigiiffinni allanilu suleqataasimasut.

Soorunami aamma arnat uiminnik annertuumik tapersersuisimasut, namminersortutut politikkimillu suliaqarsimasut, suliffimminni ineriartotsitseqataasimasut aammalu tatigisaallutik assigiinngitsuni suleqataasimasut.

Qangaanerusoq arnat tupinnaannartumik nukissaqarsimapput, ilaatigut qitornarpassuaqaraluarlutik allanik perorsagaqartarsimallutik. Imeq kuuginnanngikkallarmat, illut orserneqartanngikkallarmata, pisiassat ullumikkutut inngikkallarmata…….

Illoqarfitsinni arnarpassuit ataqqinartut, nuannaartorinartut, immikkuullarissut maligassiuisullu, eqqis- puigornagit, amerlapput.

Pisinnaasut kaammattorusuppakka sorpassuit arnat suliarisarsimasaat eqqaallugit sis 8/3 nal.16.15 iliveqarfimmut naneruusiiartoqqullugit. Sanningasorsuup eqqaani tussiaqatigiinnertalimmik eqqaaniaasoqareerpat qanigisanut/eqqaamasanut naneruusiartortoqarsinnaavoq.

Qanortoq Arnat Ulluata isumaa aammalu nammineq kajumissutsimik sulineq eqqartueqatigiiffiulluarilik.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl