Mariusimut "Narralaaqqamut" eqqaaniut

Marius, Anker, Peter Olsen, nalinginnaasumik Narralaaqqamik taagorneqartoq akornatsinniikkunnaarpoq.

Narralaaraq Sisimiuni inunngorpoq 12. februar 1943 Danmarkimilu napparsimalluni eqqissilluni ulloq 3. februar 2018. Danmarkimi ilisaavoq ulloq 8. februar 2018, Villingerød Kirke, Nordsjællandimi. Eqqaaniarneqarpoq ulloq 12. februar 2018, Sisimiut Oqaluffiani, ulloq 75-nik ukioqalerfissaraluani eqqorlugu.
Inuit naapittakkat tutsiuttartullu eqqaaniarneqarneranik arajutsisimasut, tuppallissutaasaqaat.

Narralaaqqap angajoqqaarivai, Ane Katrine & Peter Olsen, Piitannguaq.

Narralaaraq 1964 Frederikssundimi innaallagasserisutut ilinniarluni naamassivoq, ilinniarnini tamaat ulloq ataasiinnarluunniit napparsimasimanani.

Ukiorpaaluit innaallagisserisutut siulereerluni kilisaatini inuttaaneq misilikkusullugu umiartornermi kingorna Marmorilimmi innaallagasserisutut sulivoq. Marmorilimmiitsilluni sikukkut sukuutsinik aliikkutaralugu Ukkusissiarsimavoq.

Kingorna outfitteritut/takornarialerisutut piniartutullu inuuneq ingerlatilerpaa.
Narralaaqqap qimussimik angallassisarnermini qimmilerilaqqissutsini peqqissaartuulluinnarninilu ilisarnaatigai, taamaalilluni illoqarfimmut inunngorfimminut Sisimiunut aammalumi Kalaallit Nunatsinnut ambasadøriulluartutut isigisariaqarluni! Siulitsinnit kingornutagut piniarneq qimussernerlu 73-nik ukioqarluni, napparsimalluni pisinnaajunnaarnissani tikillugu, ingerlallugit.

Narralaaqqap inuusukkallarnermini ilisarnaatigilluagaasa ilagaat isikkamik arsarneq. Tassami Narralaaraaneranut tunngaviunerarneqartarpoq suli meeraalluni inersimasunut arsartunut peqataasarsimanera.
Unnialu Danmarkimi ilinniarnermi nalaani HIK-mi (Hellerup Idrætsklub) arsaqatigisarsimagaa, Ole Madsen, taamani Danmarkimi nunanut allanut arsartartuni unammisartoq. Ole unammiartoraangat HIK-mi siukkaq qiterlertut taarsertarsimavaa.

Narralaaqqap pinngortitamiinnissani pingaartitaraa inuuneralugulu.
Pingasoriarluni Sermersuarmut qimusserpoq siullermeerami tunumut ituilluni angalanermilu tassani kitaanut uteqqilluni. Sermersuakkut angalasarnini pillugit maligassiuisutut nersornaammik tunineqarpoq.
Narralaaraq Qimussimi ataqqinaammik ilaasortaavoq.
Napparsimalluni pisinnaajunnaarnermi tungaanut Narralaaraq KNAPP siulersuisuini ilaasortaavoq.

Kangerlussuarmut pisunnerpassuit ilaanni ullut marluk affallu atorsimavai. 70-sileereerlunilu nanisiarisimallugu imeqarfiup eqqaaniit Nasaasaamut, akunnerit marluk atorlugit, qaqeriarluni utertarluni. Tassalu suna aqqut atoraluaraangamiuk eqqakkanik katersiuarneq ileqquisa ilagilluinnarlugu.

Narralaaqqap ilisarnaatigai uteriinneq, piumassuseqarneq suliumatussuserlu. Timini atorlugu imminut unammillertarneq ileqqoralugu. Maalaarneq atortorinngilaa naak inuunermi naajartornerani sivisuumik anniaateqaraluaqaluni.

Narralaaraq qanigisaminut, ikinngutiminut, ilisarisimasaminut aammalumi nunaqqatiminut maligassiuilluni ukiorpassuarni inooqataavoq. Inuugallartilluni inuunermik atorluaanissamik pingaartitsisoq. Maligassiuisoq minnerunngitsumik inunngorfimmini Sisimiuni. Maanna eqqissilluni nuliami asasami nunaani qasuersaarpoq.

Mariusip Narralaaqqap eqqaaneqarnera ataqqinartuuli !

Ikinngutai

 


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl 

Blogs kingulliit