Peqatigiiffilerineq soqutigineerukkiartorpa?

(ass./foto: Johannes Ujo Müller)

 

All. Akaaraq Samuel Olsen


Qanittukkut peqatigiiffik inuiaassutsitsinnut pingaaruteqarsorilluinnagara ataatsimeersuassammat najoriartorpara. Ilissimavara tassani siuleruisuusut pisinnaanertik naapertorlugu tamaviaarlutik suliniartut, tamannalumi nersornarpoq.

Ataatsimeersuarnermut najuuttut amerlagisassaanngillat ataatsimeersuarnerli malittarisassat naapertorlugit ingerlanneqarsinnaalluni. Ingerlapparpullumi suliassallu siulersuisunit naammassineqarsimammata naammassineqarput. Siulersuisunilli qinersineq pissuteqavissumik immikkut ataatsimeersuarnissamut kinguartinneqarpoq. Tassunga kingullermut tunngatillugu oqaluuserineqarpoq maani illoqarfitsinni peqatigiiffilerinikkut ajornartorsiortoqartoq pingaartumik siulersuisussaqarnikkut.

Tamanna ilumoortuunerluni? Taamaassimapppat suut patsisaappat ilorraallu tunngaanut saatsinniarlugu qanoq iliussaagut? Inuimmi kikkulluunniit naalakkersuinermi peqataanerat aamma peqatigiiffiit aqqutigalugit ingerlanneqarpoq, tamanna kinguariartornerpoq?

Matuma kingornani peqatigiiffimmik aserorsaataasinnaasutut assersuutit ilaat eqqarsaatissiissutitut allatsiarpakka. Illit qinersisartutut qinikkatullu qanoq isumaqarpit?

Qanoq peqatigiiffik aserortersinnaagit

  1. Ataatsimiigiartarnak.
  2. Ataatsimiigiaruit inortuillutit takkugit.
  3. Takkukkaangavit allat kukkunersiornissaannut tunuarsimaartarnak.
  4. Qinigaatinngisaannarit. Akisussaaffeqanngikkuit isorisassaqarnerussagavit.
  5. Qininngippatsit narrujuummissutigiuk. Qinigaagaluaruit ataatsimiigiartarnak.
  6. Isummat tusarniarneqarpat oqaasissaqannginnerarit. Kingorna qanoq aaqqiisoqartariaqarsimagaluartoq oqaluttuarissavat.
  7. Sulilluarniarpallaartarnak. Allat suliniarpallaalerpata ajortussarsioqatissarsiorit.
  8. Peqatigiiffimmut akiliutissat akilernaveersaaruk akiliinngilluinnarilluunniit.
  9. Ataatsimeeqataasimagaangavit taaseqataasarit - angerlaruillu allatut iliorlutit.
  10. Ataatsimiinnermi siunnersuutigineqartoq akueriuk - aatsaat kingorna silataani isornartorsiuissaatit.
  11. Paasissutissanik aperineqaraangavit paasissutissiisarnak.
  12. Suliamut paasiniaanaveersaartarit, attaveqaqatigiinnerli amigarneraqiuk.
  13. Peqatigiiffippit ajunngitsorsiassaatai tamakkerniarsarisakkit illilli peqatigiiffinnut tunniusseqinak!
  14. Najukkavit il.il. allanngorneri ilisimatitsissutiginaveersaakkit.

Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl 

Blogs kingulliit