Maki Seaweed Greenland-imiit akissutit oqaatigumasallu

”Maki Seaweed Greenland-imut oqaatigiumasat” –nut Maki Seaweed Greenland-imiit akissutit oqaatigumasallu.

Siullermik tamannguassi Maki Seaweed Greenland –imiit Ukiortaami pilluaritsi, - qujanarujussuarlu ukiumut qaanngiuttumut.

Ukioq 2017 Maki Seaweed Greenland-imut siuariaataasimavoq, tamatumunnga peqqutaaginnarpoq immap naasuinik nunatsinni atuinerulerneq, - ullorlu manna tikillugu suli qujasaqaanga inuppassuit iluaqutigalugit unnersiortuartarmata, allaallumi oqartoqartarluni iluaqutigingaaramikkit pinngitsoorsinnaajunnaarsimallugit, - naak “ilisimatuussutsikkut” uppernarsaatitaqanngikkaluartunngooq.

Allapputit immap naasui sorpassuartigut iluaqutaasut, taamatullu nunatta kujataani innuttaasunit atorluarneqartuusut, - tamatuma takutiinnarpaa immap naasuinik atuineq atueriaaserlu ippinnaateqanngitsoq, nalinginnaasumillu akuerisaasoq – naak ilisimatuussutsikkut uppernarsarneqarnikuunngikkaluartorooq.

Immap naasui ilisimatuussutsikkut ukiuni untritilikkaani misissuiffigineqartuareerpoq, - sulilu ingerlanneqartuarluni…. Ingammik ukiuni makkunanerpiaq, - ima misissuiffigineqartigaat nunat suulluunniit ilisimatusartarfissuini ( Universitet-ini allanilu ) aningaasat miliuunilikkaaginnaat atorneqartuarput, sunut / qanoq aamma sooq, immap naasui taama atorfissaqartinneqartiginersut, - sulilu uanga namminerpiaq tupigusuttaqaanga qanoq, sunullu atorneqarsinnaaneri ullut tamarpiangajaasa paasisaqarfigigaangakkit, - allaallumi ilaanni imminut kanngugikujuttarpunga ajunngitsortaanik oqaluttuarsinnaaleraangama…. Ilaatigut uppernarsuseq nalorngisigissutigineqalersarmat.

Pisortaqarfinni sulisut sullitaminnut immap naasui sooq sassaalliutigineq ajortaraat suli uggorisaqaara – ilisimatuussutsikkummi paasisat imaannaanngitsut pigineqareerput, - allatuulli ujartulaaginnagassaapput, - soorlu naatitat imaluunniit puulukit, kukkukuut, nersussuit qanoq sunullu atorneqarsinnaanerinut ujartuisoqartartoq, - naak taakkua ukiuni makkunani qanoq sukujussuarnik akuugaatigineri ilisimatuussutsikkut uppernarsarneqareertigigaluaqisoq - Salmonella, MRSA Bakterie, serpartaatit toqunartullit uani eqqarsaatigalugit.

Maki Seaweed Greenland –ip tunisassiaani tarajoqassutsip annertunera :
Pingaartutut immikkut taaneqarpoq Maki Seaweed Greenland –ip tunisassiaani qanoq tarajoqartiginerinik nalunaaruteqartoqanngitsoq – tarajornippallaarneri pineqarlutik. ( Alla eqqaanngilara pisinniarfiit ilaasa sulisuisagooq mamarinngimmatigit tuniniarusunngilaat ).
Inuussutissalerinermik ilinniagallip kialluunniit ( aamma Madambassadør-iuigaanni ) ilisimaarisussaavaa tarajoq nerisassanut aanaveersaatitut atorneqartoq, - nerisassap sivisunerusumik piunissaa angujumallugu.
Maki Seaweed Greenland –ip tunisassiai piaaraluni tarajorninaagaanngillat – pinngortitalli nammineq tunniussinnaasai kisiiviisa atorlugit tunisassiaallutik, - aamma tarajoqassuseq.
Ukiuni siulliunerusuni ilisimatuussutsikkut nerisani suniluunniit tarajoqarpallaanik nerisaqarnissaq innersuunneqanngilaq – Aap, tamanna ilumoorpoq. Aammali oqaatigisariaqarpoq taratsut sananeqaatsimikkut assigiinngitsuusarneri uani eqqaasariaqartoq. Ilisimatuut taratsunik mianersoqqussutaat aallaavigalugu imaaginnarpoq nunameersunik taratsunik atuinissaq annikillisinneqartussaq – allaalluinnarpulli immap tarajui.

Immap tarajui inuup timaanut tulluunnerupput nunap tarajuininngarnit, aammalu oqaatigineqareerpoq Maki Seaweed Greenland –ip tunisassiai sunngnuanilluunniit akuugaanngitsut, - makkuali taratsut nunameersut suugaluarnersunik aamma akuugaapput – ilaatigut juumik ( jod – iodine ) kemisk-imik sanaajusoq – immalli naasui juumik pinngortitameersumit akoqarput… allanik nalusatsinnik akuugaanatik.

Tarajoqarneri Maki Seaweed Greenland –ip iluatigeqai – piusinnaaneri taama isilluni qulakkeerneqartussaammata…. Ilanngullugu oqaatigineqassaaq, DTU suleqatigalugu tunisassiat piusinnaaneri pillugit misissuisoqarmat, - uanilu inerneraat tarajoqassusii panerluartinneqartarnerilu peqqutaallutik oqummik bakterissanilluuniit naajoqarfigineqarsinnaangitsut, - tassani tarajoqarneri peqqutaaqataalluinnarpoq.

Tarajoqassuseq eqqartorneqassappat eqqaanngitsoorusunngilara maannakkut ulluinnarsiutaalernikut “Franske Kartofler”…. Taakkua tarajoqarnerujussuupput, - timimullu peqqinnannginnerujussuullutik.

Maki Seaweed Greenland –ip tunisassiaani allagartalersuineq aamma eqqaaneqarpoq, - tupinnanngilaq, tamannalu anguneqareersimassagaluarpoq aningaasatigut, piginnaanikkut Maki Seaweed Greenland Royal Greenland-itulli angitigigaluaruni, maannakkulli suut tamarluinnaasa nalunaarsorteqqissaassallugit akissaqanngilaq nukissaqaranilu, – taamatut nalunaarsuisarneq akisoorujussuuvoq – tamannalu inuussutissalerinermik ilinniagaqarsiamasup pinngitsoorani aamma ilisimasariaqarluinnaraluarpaa, - taamaakkaluartoq Uumasut Nakorsaata piumasaqaatai tamarluinnaasa naammassillugit Maki Seaweed Greenland tunisassiorpoq, - aamma allagartalersuinermut piumasaqaatit pillugit.

Maki Seaweed Greenland –ip tunisassiai imaasiallaannarlugit nerineqarsinnaannginneri uparuarneqarpoq, aamma qujanaq.
Qeqqussat pilutaasa ilai issunerusarput, panertinneqaraangamillu manngertinnerusarlutik…. Aammali imermut, imaluunniit sumulluunniit imerpalasumut ikineqarunik aqilissapput akui peqqinnartut allanngunngikkaluarlugit, - soorlu uanga nammineq ullaakkorsiutinnut akuliukkaangakkit immuup aqilitereeraangagit ajornaquteqanngitsumik tamuasinnaanngortarikka – sulilu tusarnikuunngila sunaluunniit panertitaq aqilisoq.
Ullormut 5 gram “annertuallaaqaaq”, - kisianni iibilit arfinilinniit ( serpartarnerqarnikunit ) peqqinnarnerupput. Piumasaqaataanngilaq ullormut 5 gram pinngitsoorani nerineqartartussat – inuulli nammineq qanoq annertutigisoq pisariaqartinnerlugu misileraanermigut inississinnaavaa – imminut aallaavigaluni – 5 gram-ili nalinginnaasumik ilisimatuussutsikkut innersuunneqakkajuttarpoq.


Blogsimut allagit

Isummersuummik oqallissaarummilluunniit allagaqarusukkuit uunga allassaatit: 

info@silleq.gl 

Blogs kingulliit